SEFOPE realiza semináriu igualidade jéneru iha Vila Nova, Baucau, kinta (02/06). Imajen Tatoli/Natalino Belo.

BAUCAU, 02 juñu 2022 (TATOLI) – Sekretaria Estadu Formasaun Profesional no Empregu (SEFOPE) kinta ne’e, realiza semináriu kona-ba igualidade jéneru ho tema “formasaun profisionál no empregu hakbi’it feto iha vida ekonomia”.

Diretór Jerál Administrasaun no Finansa Interinu SEFOPE, Gerlado Monis, esplika, objetivu hosi semináriu refere atu hakle’an liután kona-bá polítika SEFOPE nian ne’ebé fó apoia ba sentru formasaun no grupu auto-empregu sira.

“Igualidade jéneru ne’e tenke importante nune’e iha balansu entre feto ho mane atu nune’e bainhira formandu bele hetan kampu traballu iha área ne’ebé presiza,” Diretór Jerál Administrasaun no Finansa Interinu SEFOPE hateten iha Vila Nova, kinta ne’e.

SFOPE seidauk identifika kazu ruma kona-ba igualdade jéneru maibé presiza hasa’e konsiénsia tanba kultura timor nian mak sei domina hanesan feto tenke halo serbisu iha dapur no tau matan ba labarik inklui serbisu seluk iha uma-laran.

Nune’e liuhosi hosi semináriu refere bele muda karaterístika, hakle’an igualdade jéneru balansu entre feto no mane hanesan, nune’e bainhira tuir formasaun iha área konstrusaun feto mós iha abilidade no profisaun atu halo serbisu no mane mós bele halo serbisu iha área ospitalidade.

“Realidade ita-nia sosiedade sei abitua hela serbisu ne’ebé mak feto nian, husik feto mak halo no mane halo serbisu mane nian,” Gerlado akresenta.

SEFOPE sempre apár ho realidade tuir situasaun ne’ebé akontese hanesan hasa’e taxa persentajen igualdade jéneru, liuliu partisipasaun feto iha fatin serbisu ho persentajen 40% nune’e bele bele hola-parte iha kampu serbisu.

Diretór Sentru Formasaun Dezenvolvimentu Komunitária (CDC, sigla portugés), Vicente Matos Belo, konsidera semináriu refere importante tanba habelar informasaun polítika iguladade jéneru liuliu feto sira atubele partisipa iha sentru formasaun sira.

CDC rasik daudaun-ne’e rejista formandu feto hamutuik na’in-15 korresponde ho 40% no mane 18 tótal hamutuk formandu na’in-33.

Timor-Leste ratifika ona Convention on the Elemination of all forms of Discrimination against Women (CEDAW) ka konvensaun internasionál ne’ebé foka liu ba direitu feto sira, liuliu atu halakon diskriminasaun ba feto hahú hosi tinan 2003.

Nune’e Timor-Leste iha obrigasaun atu implementa konvensaun refere iha aspeitu kulturál, ekonomia, sosiál no politika ne’ebé kada tinan halo relatóriu fazeadamente ba CEDAW kona-ba dezenvolvimentu no progresu implementasaun iha institusaun privadu, públiku no sosiedade sivíl.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here