DILI, 02 junu 2022 (TATOLI)—Rede Feto Timor Leste (RFTL), kinta ne’e, realiza Asembleia Membru Anual 2020-2021 hamutuk hametin igualdade ne’ebé inkluzivu no sustentavél.
Bazea ba estatutu Rede Feto Timor Leste artigu 19 kona-ba definisaun asembleia membru iha oin tolu mak asembleia Membru anuál (AMA) ne’ebé hala’o tinan ida dala ida. Asembleia Jeral Membru (AJM) ne’ebé hala’o kada tinan haat, Asembleia Membru Estraordináriu (AME) depende ezijénsia Rede Feto nia kualker tempu no lidera hosi konsellu diretoria.
Prezidente Rede Feto, Zelia Fernandes, hateten bazeia ba artigu ne’ebé mak hateten iha tinan 2020 no 2021, Rede Feto Timor Leste la konsege organiza Asembleia membru anuál ba tinan rua tutuir malu tanba hasoru problema Interna Rede Feto nian tanba ne’e la realiza.
“Tuir artigu 23 estatutu Rede Feto Timor-Leste nia define katak asembleia anuál hala’o tinan ida dala ida maibé ami la konsege halo iha 2020 no 2021 tanba hasoru problema, no ba loron ida ohin kompete ba asembleia membru Anuál ka objetivu hosi membru anuál iha pontu importante sira ida mak aprezenta relatóriu anuál ba iha relatóriu narativu ka relatóriu programa no finansa 2020 no 2021. Seluk mak sei aprova anuál 2022, sei kompete mós asembleia anuál mak simu membru foun ne’ebé durante ne’e halo ona aplikasaun ba rede feto no ohin avalia no deside liuhosi aprovasaun forum ne’e,” nia dehan.
Embaixadora Plan Internasional Timor-Leste (PITL), Cidalia Lopes Nobre Mouzinho Guterres, hateten asembleia jeral rede feto nu’udar prosesu importante hodi hametin liu tan organizasaun institusionalmente.
“Onra mai ha’u simu konvite ida-ne’e hosi Rede Feto atu hola parte iha asembleia ne’ebé mak realiza kada tinan. Tanba, ha’u fiar katak asembleia jerál nu’udar prosesu importante ida hodi hametin liután Organizasaun institusionalmente,” Cidalia hateten.
Embaixadora haktuir katak asembleia ne’e mós sei relata atividade ne’ebé mak rede feto halo iha tinan ida-nia laran inklui dezafiu no lisaun aprendizajen hodi bele halo di’akliu tan servisu Rede Feto ninian.
Nia hateten, durante nia akompaña situasaun tinan hira ba kotuk ne’ebé Rede Feto hasoru maibé ho grasa Maromak nian iha ona desizaun ne’ebé mak fó sai ona.
“Iha asembleia ida-ne’e mós hanesan ohin Prezidente Rede Feto hato’o ona katak sei hato’o kona-ba situasaun saida mak hala’o tiha ona. Durante ne’e ha’u mós akompaña tinan hira ba kotuk situasaun ne’ebé mak Rede Feto hasoru gracas a deus iha ona desizaun ne’ebé mak fó sai ona,” nia dehan.
Cidalia mos iha deseza katak servisu sira hotu sei barak mak presiza sei halo tanba tema sentrál ne’ebé mak hateten katak hamutuk hametin igualidade ne’ebé inkluzivu no sustentável ne’ebé hanoin feto hotu-hotu tenke lolo liman hamutuk para hodi sa situasaun de’it mak feto hasoru.
Sekretariu Estadu Igualdade no Inkluzaun (SEII), Maria do Rosario Fatima Correia, hatutan Timor Leste restaura nia indepedensia ba dala-20 feto nafatin hasoru malu hodi luta ba igualdade jéneru no inkluzaun.
Nia hatutan, sente kontente tebes bele mai hamutuk ho Rede Feto Timor Leste realiza Asembleia Membru Anuál 2020-2021.
“Ha’u kontente tebes no orgullu tanba bele mai hamutuk ho membru Rede Feto, mezmu iha problema maibé konsege ultrapasa problema, ohin mai hala’o nia anual enkontru hodi hala’o vizaun no misaun ne’ebé prevee ona iha estatutu,” nia dehan.
Jornalista : Osória Marques
Editór : Cancio Ximenes
