Xefe Departamentu MSSI RAEOA, Adelino Cau. Imajen Tatoli/Abílio Elo Nini.

OÉ-CUSSE, 02 juñu 2022 (TATOLI) – Ministériu Solidariedade Sosiál no Inkluzaun (MSSI) liuhosi Servisu Solidariedade Sosiál iha Rejiaun Administrativa Espesiál Oé-Cusse Ambeno (RAEOA), rejista lista benefisiáriu foun ba idozu-invalidés hamutuk na’in-537 iha 2022.

“Lista editál benefisiáriu rejista iha faze dahuluk tinan ne’e hamutuk 537, idozu 526 no invalidés 11, dadus ne’e autoridade lokál-sira mak submete, nune’e parte MSSI rejista no kontinua prosesa ba nasionál,” Xefe Departamentu Solidariedade Sosiál iha RAEOA, Adelino Cau, hatete iha Oé-Cusse kinta ne’e.

Nia informa, benefisiáriu hirak-ne’e kompleta dokumentu sira, hanesan billete identidade, kartaun eleitorál, nune’e Institutu Nasionál Seguransa Sosiál (INSS), bele kria sira-nia konta bankária, tanba tuir kaléndariu sei halo pagamentu iha loron 10 juñu ne’e.

“Ita hein de’it kuandu osan tama ona iha banku, ita hahú fahe daudaun, tanba naran ba lista benefisiáriu sira iha distribui ona iha kada suku no sub-rejiaun sira, taka iha-ne’ebá nune’e to’o loron 10 fulan ne’e, sira bele hakbesik ba atu atualiza sira-nia naran,” nia katak.

Bazea lista anteriór ne’ebé rejista iha servisu solidariedade sosiál RAEOA hamutuk 6.421, komposta hosi idozu 6.346 no invalidés hamutuk 106.

Nune’e benefisiáriu hosi sub-rejiaun Nítibe hamutuk 1.309, sub-rejiaun Oésilo hamutuk 1.410, iha sub-rejiaun Pássabe hamutuk 772 no iha sub-rejiaun Pante Makasar hamutuk 2.961.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here