Labarik sira halai tama areadór Palásiu Prezidente, hafoin hetan autorizasaun hosi Prezidente Repúblika, José Ramos Horta, hodi cocktail hamutuk, iha ámbitu serimónia komemoraun loron Restaurasaun Independénsia Timor-Leste ba da-XX, iha Bairro Pité, sesta (20/05). Imajen Tatoli/Francisco Sony

VIQUEQUE, 02 juñu 2022 (TATOLI)–Sosiedade sivil liuhosi Organizasaun Naun Governamentál K’nua Haberan Komunidade (KHK) iha Viqueque husu Parlamentu Nasionál (PN) aselera diskusaun no aprovasaun projetu lei protesaun ba labarik.

“Ho ida-ne’e, ami reprezenta sosiadade sivil, husu Parlamentu Nasionál hodi aselera lei ba protesaun labarik, lei ne’e esbosu iha ona maibé sei pendente hela iha Parlamentu Nasionál. Molok halo aprovasaun bele loke audénsia públika hodi sosiadade  sivil bele fó ninia hanoin kona-ba lei ne’e,” Diretór KHK, Augusto Pinto, hateten ba Agência Tatoli, iha ninia knaar fatin, Beobe, Viqueque vila, kinta ne’e.

Notísia relevante: Komisaun F sei halo re-abertura ba artigu balun projetu-lei protesaun labarik

Nia dehan, presiza iha audénsia públika ho parte legál hanesan Asisténsia Legál ba Feto no Labarik (Alfela) no Judicial System Monitoring Programme (JSMP) hodi fó opiniaun ba lei protesaun labarik.

Iha fatin ketak, Adjutu Eskola Referénsia Lian Portugés, Centros de Aprendizagem e Formação Escolar (CAFE) Viqueque, José de Carvalho, konsidera lei ne’e importante ba labarik no foin-sae sira, tanba ne’e presiza hetan konsiderasaun.

“Ha’u hanoin lei protesaun ba labrik sira importante tebes. Tanba ne’e, ita-nia líder sira tenki diskute lalais hodi hetan aprovasaun hosi Parlamentu Nasionál no haruka ba Prezidente Repúblika hodi bele promulga,” nia akresenta.

Haree mós katak daudaun ne’e iha Timor-Leste, labarik menór idade barak maka sei  kontinua fa’an sasán no bainhira la proteje didi’ak labarik sira-nia direitu maka sira labele asesu ba edukasaun formál no naun formál.

Projetu lei protesaun ba labarik no foin-sa’e ne’ebé hasoru perigu iha kapítulu hamutuk sia no artigu 103.

Iha introdusaun projetu lei ne’e deskreve katak Konstituisaun Repúblika Demokrátika Timor-Leste rekoñese labarik kualidade nu’udar sujeitu fundamentál autónomu relasiona ho família, hodi rekoñese ninia direitu fundamentál atu hetan protesaun hosi família, komunidade no Estadu, liuliu kontra forma hotu-hotu ba abandonu, diskriminasaun, violénsia, opresaun, abuzu seksuál no esplorasaun (artigu 18º, nº 1).

Lei Fundamentál impoin ba Estadu devér atu promove, tuir nia posibilidade, edukasaun, saúde no formasaun profisionál ba foin-sa’e sira (artigu 19º, nº 2).

Iha ámbitu dispozisaun konstitusionál sira, orden jurídiku Timór nian adota prinsípiu hosi direitu internasionál no inkorpora iha orden jurídiku internu norma sira ne’ebé konsta iha konvensaun, tratadu no akordu internasionál sira (artigu 9º, nº 2).

Fó importánsia ba instrumentu jurídiku internasionál sira kona-ba direitu fundamentál sira ne’ebé tau baliza ba protesaun ba labarik iha Timor-Leste, liu-liu, Deklarasaun Universál Direitu Umanu hosi tinan 1948, Paktu Internasionál Direitu Sosiál no Polítiku sira hosi tinan 1966, Paktu Internasionál Direitu Sivíl no Polítiku sira nian hosi tinan 1966, Konvensaun kona-ba Direitu Labarik hosi tinan 1989, Protokolu Fakultativu ba Konvensaun kona-ba Direitu Labarik relasiona ho Fa’an Labarik sira, Prostituisaun Infantil no Pornografia Infantil hosi tinan 2000, 

Nune’e mós, Protokolu Fakultativu ba Konvensaun kona-bá Direitu Labarik nian ba Partisipasaun iha Konflitu Armadu hosi tinan 2000 no mós Konvensaun nº 182, Kona-ba Interdisaun ba Forma A’at Liu ba Labarik nia Traballu no ba Asaun Imediatu hodi Halakon Nia hosi tinan 1999, no ikus mai mak Konvensaun Kona-ba Protesaun ba Labarik no Kooperasaun iha Matéria Adosaun Internasionál hosi tinan 1993.

iha ámbitu lejizlasaun ordináriu, Timor-Leste adota iha ámbitu sivíl no iha ámbitu penál, dispozisaun protetiva sira ne’ebé aliñadu ho prinsípiu hosi superiór interese ba labarik no ba protesaun integrál.

Iha ámbitu penál, halo inkorporasaun ba iha Kódigu Penál Timor nian tipifikasaun ba infantisídiu (artigu 142º), ba espozisaun ka abandonu (artigu 143º), maus-tratus ba menór (artigu 155º), ba prostituisaun infantil (artigu 175º), ba pornografia infantil (artigu 176º), ba abuzu seksuál ba menór (artigu 177º) no ba aktu seksuál ho foin-sa’e sira (artigu 178º).

Iha ámbitu sivíl, halo inkorporasaun ba garantia fundamentál sira ba iha Kódigu Sivíl ho objetivu atu halo luan liután protesaun ba labarik no foin-sa’e sira, liuliu iha ámbitu podér paternál, inklui nia irrenunsiabilidade (artigu 1762º) no prinsípiu ba fahe responsabilidade sira (artigu 1758º), no mós devér ba kooperasaun no solidariedade familiár ne’ebé plasmadu iha devér sira atu presta alimentu ba oan sira (artigu 1799º) no ba inan (artigu 1764º).

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here