Vise Ministru Administrasaun Estatál, Lino de Jesus Torrezão, , inaugura Uma Kbiit Laek (UKL), hamutuk unidade sia iha postu administrativu Maucatar Munisípiu Covalima.Imajen/TATOLI.Celestina Teles

COVALIMA, 01 juñu 2022 (TATOLI)-Vise Ministru Administrasaun Estatál, Lino de Jesus Torrezão, kuarta ne’e, inaugura ona Uma Kbiit Laek (UKL), hamutuk unidade sia iha postu administrativu Maucatar Munisípiu Covalima.

Projetu komunitária ne’e konstrõe ho orsamentu jerál Estadu tinan 2021. Uma Kbiit Laek (UKL) unidade sia ne’e ho tipu rua, dahuluk ho metru kubiku 37 ho ninia orsamentu kuaze $16.000, no daruak ho medida metru kubiku 48 ho orsamentu $ 17.000.

Notísia Relevante :Konstrusaun Uma Kbiit Laek 90 iha Covalima atinje ona 75,54%

UKL sia ne’e  harii ba família kbiit laek sira iha suku Belekasak hamutuk tolu, suku Ogues iha tolu no suku Holpilat iha tolu.

No husi uma sia ne’e, uma lima ho medida  metru kubiku 48 no uma haat ho metru kubiku 37.

Vise Ministru Administrasaun Estatál, Lino de Jesus Torrezão, husu ba benefisiáriu sira atu uza uma ne’e ho kuidadu no responsabilidade atu nune’e bele dura to’o tinan barak.

“Ha’u nia mensajen ba benefisiáriu sira  uza uma ne’e ho koidadu iha espíritu pertense katak uma ne’e ha’u-nian nune’e uza uma ne’e bele to’o tinan 20 ka 30,” nia hateten iha ninia diskursu bainhira inaugura UKL iha aldeia Busa-da’o,  suku Belekasak.

Tuir nia harii Uma Kbiit Laek ne’e hanesan parte ida husi programa Governu nian atu kontribui ba dezenvolvimentu nasionál liu-liu atu dignifika família kbiit laek sira iha territóriu Timor-Leste.

Tuir dadus durante tinan 2021, Ministériu Administrasaun Estatál (MAE) liuhosi Programa Nasionál Dezenvolvimentu Suku (PNDS), konstrõe ona UKL ba família kbiit laek hamutuk 1.254 iha Timor-Leste.

Iha biban hanesan Administradór Postu Administrativu Maucatar, Constantino do Carmo Cardoso, relata postu administrativu ne’e hetan UKL hamutuk 12,  uma tolu iha harii iha suku Belekasak, uma tolu iha suku Holpilat, uma tolu iha suku Ogues, no uma tolu iha suku Matai ne’ebé daudaun ne’e sei iha prosesu konstrusaun.

“Ha’u hanesan administradór hato’o  agradese ba polítika VIII  Governu Konstituisionál hodi dezenvolve rai ida  ho nune’e ohin  komunidade simu daudaun ona  UKL,”nia hateten.

Benefisiáriu programa UKL, Maria Cardoso, agradese ba Governu tanba harii ona uma ba sira hodi hela.

“Ohin ami sente kontente bainhira vise Ministru Administrasaun Estatál entrega ona xave mai ami, ami bele sai benefisiáriu ba UKL ne’ebé oferese hosi governu,”nia hateten.

Entretantu, Ekipa Programa Nasionál Dezenvolvimentu Suku (PNDS) konstrui ‘Uma Kbiit Laek’ (UKL) iha munisípiu Covalima hamutuk unidade 90 ne’ebé implementa iha suku 30 ne’ebé pertense ba postu administrativu hitu (7) ho totál orsamentu hamutuk  $1,491.000.

Harii sede aldeia

Xefe Suku Belekasak, Postu Administrativu Maucatar Munisípiu Covalima,  Leonito Gusmão husu ba Vise Ministru Administrasaun Estatál (MAE), Lino de Jesus Torrezão, atu tau iha programa governu nian hodi harii sede aldeia nune’e bele fasilita  servisu autoridade lokál iha baze.

“Durante ne’e bainhira ami hala’o enkontru iha nivél aldeia la iha edifisiu nune’e ami uza de’it xefe aldeia nia uma hodi sai fatin enkontru ne’e la dignu,” nia hato’o pedidu ne’e diretamente ba Vise Ministru Administrasaun Estatál Lino de Jesus Torrezão, bainhira inaugural Uma Kbiit Laek, iha suku Maucatar, kuarta ne’e.

Postu Administrativu Maucatar, iha suku haat no aldeia 22, suku haat ne’e kompostu husi  Belekasak, Holpilat, Matai no Ogues.

Hatan ba pedidu ne’e, Lino de Jesus Torrezão, hateten  Governu tau ona iha planu no programa maibé daudaun ne’e sei fó uluk prioridade ba reabilitasaun sede suku no kompleta ho ekipamentu servisu hanesan komputadór no seluk tan.

“Ita halo buat-ida la’ós ho simultania, ita-halo ona sede suku ita hakarak halo tan sede aldeia tanba aban bainrua ita-sei tau sede aldeia ka sentru komunidade ida ne’e maske iha ona planu hateke ba oin ona halo neineik”nia dehan.

Notísia Relevante :Governu sei identifika uma-kain 6.000 sai benefisiáriu UKL+

Jornalista: Celestina Teles

Editor: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here