Xefe Estadu Maiór F-FDTL, Tenente Jenerál Falur Rate Laek, hala’o vizita dahuluk ba RAOEA. Imajen Mídia ZEESM.

OÉ-CUSSE, 02 Juñu 2022 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, kinta ne’e halo vizita kortezia ba Rejiaun Administrativa Espesiál Oé-Cusse Ambeno (RAEOA), hodi observa kondisaun no situasaun Komponente Navál ne’ebé destaka iha rejiaun ne’e.

Xefe Estadu Maiór Jenerál F-FDTL ne’e hala’o vizita ba konstrusaun foun F-FDTL, ne’ebé konstrui iha bairru Sikone, aldeia Manuimpena, suku Lalisuk, sub-rejiaun Pante Makasar.

“Ha’u mai Oé-Cusse halo parte ha’u-nia vizita ofisiál, vizita interrogatóriu ba lideransa foun F-FDTL, ne’ebé kompañia ida destaka iha Oé-Cusse, mai haree situasaun no kondisaun, haree mós infraestrutura ne’ebé atu halo ba futuru instalasaun postu foun, atu observa saida mak presiza kompleta iha obra ne’e,” Falur Rate Laek, informa ba jornalista sira hafoin remata enkontru kortezia ho Prezidente Autoridade RAEOA, iha Gabinete ZEESM Oébau, Oé-Cusse.

Tenente Jenerál ne’e agradese ba autoridade RAEOA, tanba iha disponibilidade atu loke tán estrada ho eletrifikasaun ba iha infraestrutura foun forsa armada nian ne’e, tanba bee-moos kompleta ona.

Prezidente Autoridade RAEOA, Arsénio Paixão Bano, informa, vizita kortezia ne’e tanba Falur mai Oé-Cusse, aprezenta postu seguransa sira hotu ba futuru destakamentu, tanba foin troka Jenerál reformadu Lere Anan Timur, mai hanesan haree kondisaun kuartél foun ne’ebé harii iha Oé-Cusse kuaze tinan ida ona.

“Ohin autoridade mós rekomenda atubele uza ona, destaka kompañia ida, no ita kompromete atu halo estrada foun liga obra foun ne’e hosi bairru Oétulu, Sikone ba Padiae, no mellora eletrifikasaun iha obra foun ne’e,” nia katak.

Nu’udar autoridade orgullu tanba ho vizita ofisiál ne’e, nune’e lideransa másimu iha F-FDTL nian bele koñese funsionamentu autoridade nian iha Oé-Cusse, no sujere atu realiza atividade animasaun barak, tanba Oé-Cusse rai enklave.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan