Estudante kursu lian koreia rejista atu tuir teste Employment Permit System, iha salaun DNEE, Becora, kinta (02/06). Imajen/SEFOPE

DILI, 02 juñu 2022 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE) hamutuk ho Korean Student Language Program (KSLP) iha Timor-Leste, kinta ne’e, rejista ona estudante kursu lian koreia hamutuk 1.500.

Inskrisaun estudante kursu lian koreia ho objetivu atu tuir Employment Permit System (EPS-Topik) ka teste sistema permisaun empregu tinan ne’e, ne’ebé rejistrasaun hahú loron 02 to’o 09 juñu 2022.

“Ohin ita halo rejistrasaun ba estudante ne’ebé tuir ona kursu iha eskola lian koreia iha Becora hamutuk 1.500, no ohin ita halo mós registu hotu estudante sira ne’ebé tuir kursu iha sentru formasaun privadu sira no estudante tuan sira ne’ebé uluk tuir teste maibé la liu no hakarak tuir filafali,” Diretór Nasionál Empregu Exteriór, Filomeno Soares, hateten, iha salaun DNEE, Becora.

Notísia relevante: Traballadór Koreia Kontribui Ona Osan Milliaun $45 Resin

Diretór ne’e dehan, estudante sira ne’ebé rejista ona sei tuir ezame iha augustu tinan ne’e, nune’e bainhira sira tuir ezame mak liu, sira-nia naran hatama ona sistema hodi sira bele prepara-an bainhira iha pedidu ba serbisu iha Koreia Súl.

“Ha’u husu ba estudante sira ne’ebé ohin hahú rejista filafali ona, ba uma tenke estuda hodi hein atu tuir ezame EPS-Topik, tanba ezame lian koreia ne’e ho sistema online, nune’e atu liu ka la liu ne’e depende ba ema ida-idak nia esforsu,” nia hameno.

Dokumentu ne’ebé ohin estudante sira tenke lori tuir rejistrasaun mak foto koloridu 3×4 tahan rua (kotuk mutin), registu tenke lori pasaporte no ba sira ne’ebé mak seidauk iha bele lori Billete Identidade (BI) ka Eleitorál kópia koloridu, inklui osan $24, kritéria hirak ne’e fó sai hosi Ministériu Traballalu Koreia Súl ba nasaun hotu ne’ebé haruka joven sira bá serbisu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here