Areadór eskola Ensinu Baziku Filiál (EBF) Lahomea, postu administratrivu Maliana, munisípiu Bobonaro. Imajen Tatoli/Sérgio da Cruz.

BOBONARO, 02 juñu 2022 (TATOLI) – Kordenadór Ensinu Bazíku Filiál (EBF) Lahomea, postu administrativu Maliana, munisípiu Bobonaro, José dos Reis, husu Ministériu Edukasaun Juventude no Desportu (MEJD), atu konstrui moru protesaun hodi asegura fasilidade no infrastrutrura eskola refere.

Nia haktuir, eskola refere harii iha tinan 1999 mai to’o nia 2012 governu halo reabilitasaun ba sala aula maibé seidauk kontrui moru haleu eskola.

Koordenadór EBF Lahomea, postu administrarivu Maliana, munisípiu Bobonaro, José dos Reis. Imajen Tatoli/Sérgio da Cruz.

“Ami hakarak Ministériu Edukasaun tenke kontrui moru, tanba dalaruma dadeer ami mai tenke hamoos lai bibi-tén ne’ebé lekar buradu iha eskola oin, entaun kuandu atu hahú aula ami tenke bolu estudante sira lalin bee fase no hamoos durante menutu 30 hanesan ne’e, mos tiha mak foin hahú aula,” nia informa ba Tatoli, iha kna’ar-fatin, kinta ne’e.

Nia dehan, alende animál, iha mós komunidade liuliu joven sira movimenta livre halo barullu iha eskola oin bainhira ensinu aprendizajen la’o hela, inklui iha tempu kalan ema deskoñesidu hemu lanu baku rahun vidru no hakerek arbiru iha didin lolon.

Profesór sira akompaña hela estudante sira konsumu ai-haan merenda eskolár. Imajen Tatoli/Sérgio da Cruz.

“Dalaruma sira la’o ba mai, ami koalia barak liu dehan ami ladi’ak, ida-ne’e ami  hanesan manorin sente triste loos haree situasaun ne’e, ami mós durante ne’e sempre hato’o problema ne’e ba edukasaun munisípiu Bobonaro atu hato’o ba leten maibé to’o agora laiha resposta,” nia hatutan. Bendita Ili, nu’udar manorin-na’in sente triste haree ba situasaun ne’e, tanba ne’e husu MEJD tenke tau atensaun.

“Durante ne’e hala’o prosesu apredzajen la ijiene ona, tanba animál nia fo’er ne’e dalaruma ita bele rega no dasa mos hotu ona, kuandu loro-matan kona anin hú mai nia iis tama fali aula laran,” nia informa.

Nia sujere ba governu atu kontrui mós dapur ba programa merenda eskolár, tanba kondisaun dapur refere bebak balun dodok, inklui la saudável ona ba distribuidór sira fornese ai-han ba estudante sira.

Eskola refere iha sala aula hamutuk hitu ho totál estudante hosi primeiru-anu to’o sestu-anu hamutuk 212, kompostu hosi feto 99 no mane 103, fahe turnu rua dadeer no lokraik. Eskola refere iha profesór na’in-sia no guarda eskola ida.

Jornalista   : Sérgio da Cruz

Editór         : Evaristo Soares Martins

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here