Ekipa Diresaun Transporte Terrestre (DTT) Munisípiu Bobonaro, troka hela sinál tránzitu iha estrada urbana kapitál Maliana. Imajen Tatoli/Sérgio da Cruz.

BOBONARO, 02 juñu 2022 (TATOLI) – Diresaun Nasionál Transporte no Terrestre (DNTT) Munisípiu Bobonaro, kinta ne’e hahú troka sinál tránzitu tuan iha estrda urbana kapitál Maliana ne’ebé durante ne’e hetan estragu hosi dezastre naturál inklui balun letra la moos ona.

Diretór Transporte no Terrestre Bobonaro, José Paulo Hnerique Baptista, eplika bazea ba pedidu ne’ebé aprezenta ba nasionál iha tinan kotuk, atu troka hotu sinál tránzitu hahú hosi estrada protokolu postu Administrativu Atabae mai to’o estrada urbana kapitál Maliana hamutuk 253, maibé responde de’it sinál 22 nune’e labale kobre hotu.

Diretór Transporte Terreste Munisípiu Bobonaro. Imajen Tatoli/ Sérgio da Cruz. José Paulo Hnerique Baptista.

Enkuantu iha governu anteriór mandatu 2016 ba leten, ekipa DNTT estabelese ona sinál tránzitu iha kapitál Maliana kompostu hosi sinál informasaun, bandu, obrigatóriu hamutuk 50-resin, maibé depois ida-ne’e barak mak hetan estragu hosi ema deskoñesidu no balu tanba falla iha koordenasaun momentu kosntrui estrada, hasai sein koñesimentu.

“Hahú ohin ami sei subtitui sinál sira iha estrada urbana kapitál Maliana, liu-iu sinál sira-ne’ebé estraga hanesan lina ida hosi rotunda ba to’o merkadu laran ne’e, depois hosi Mugis mai to’o amigu nia ne’e no iha mós sinál bandu ida iha Obor, sei troka mós iha ospitál oin ne’e ida, sinál bandu ne’e troka fali sinál labele klakson,” nia informa ba jornalista sira, iha kna’ar-fatin, kinta ne’e.

Diretór ne’e akresenta, hafoin ekipa halo subtituisaun ba sinál hirak-ne’e, ba oin ekipa nasional sei sosializa iha suku-suku atu konsiensializa komunidade, utente rodoviáriu sira atu kuidadu fasilidade hodi garante seguru iha estrada públiku.

Ekipa Diresaun Nasionál Transporte no Terrestre Munisipiu Bobonaro prepara hela sinál foun atu subtitui sinál tránzitu tuan ne’ebé hetan estragu. Imajen Tatoli/Sérgio da Cruz.

Diretór ne’e argumenta, atu kuidadu fasilidade públiku ne’e la’ós responsablidade DNTT no PNTL de’it, maibé presiza kontribuisaun hosi entidade hotu, liuliu autoridade munisípiu, lideransa komuntária sira, tanba sinál hirak-ne’e bele asegura no salva ema-nia vida.

“Ha’u nafatin fó hanoin ba utente estrada públiku no entidade sira hotu, katak sinál tránzitu ne’e ita haree tuir nia valór projetu ne’e kiik loos, maibé nia funsaun ne’e boot-liu tanba atu asegura ita hotu ne’ebé utiliza estrada,” nia fó hanoin.

DTT Bobonaro iha ona mapeamentu ona atu subtitui sinál sira seluk hosi estrada prinsipál sira no urbana, maibé sei koordena ho parte relevante, liuliu diresaun servisu ponte no estrada nune’e iha tempu tuir mai halo montajen tuir regra estandarte konvensaun internasionál.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here