Ministériu Finansa halo enkontru ho dirijente instituisaun Estadu hodi ko’alia kona-ba serbisu integradu planu jestaun patrimóniu Estadu, iha salaun CNE, Caicoli, kinta (02/06). Imajen Tatoli/António Daciparu

DILI, 02 juñu 2022 (TATOLI)—Komisáriu Komisaun Antí-Korrupsaun (CAC, sigla portugés), Sérgio Hornai, husu ba kargu xefia iha instituisaun Estadu nasionál no munisipál atu kontribui redús despeza patrimóniu Estadu.

“Ministériu Finansa iha obrigasaun atu promove polítika jestaun bens no móvel Estadu ninian ho kolaborasaun ne’ebé metin no di’ak ho entidade públiku ka entidade relevante sira, halo afirmasaun kompleta no barak. Entaun, lori ita halo reflesaun ida oinsá mak bele haree Governu halo tiha jestaun polítika dada tiha patrimóniu hosi kargu xefia no atribui fali ho kriasaun subsídiu transporte,” Komisáriu CAC hateten iha ámbitu serimónia abertura sesaun traballu integradu jestaun patrimóniu Estadu, iha salaun Komisaun Nasionál Eleisaun (CNE, sigla portugés), kinta ne’e.  

Nia dehan, entidade sira ne’ebé utiliza patrimóniu Estadu sira tenke jere ho di’ak no responsabilidade.

“Hanesan komisáriu ne’ebé servisu mós hanesan koazuvadór iha órgaun judisiáriu nian, hakarak hateten katak ita boot sira bele uza veíkulu Estadu iha oras 24 nia laran, maibé ninia objetivu ikus ne’e uza ba saida, iha ka lae lisensa, kuandu laiha maka tenki simu responsabilidade tanba uza sasán Estadu nian ba interrese pesoál,” nia fó hanoin.  

Notísia relevante: Governu gasta millaun $1,6 ba subsídiu transporte kada tinan 

Tanba ne’e, Sérgio Hornai konsidera laiha razaun atu lori karreta ida fila bá uma bainhira la’ós atende servisu profisionál.

“Ita-boot (xefia) sira mak sai hanesan sabedoria, mata-dalan no ezemplár. Ita hotu iha paixaun ba ida-ne’e, hakarak ka lakohi ita hotu presiza halo komprimentu ba legalidade ne’e. Tanba polítika jestaun ekonomia, despeza sei halo hosi Ministériu Finansa, hosi sira-nia apresiasaun sira hamosu rezolusaun, dekretu-lei, no ita-nia obrigasaun atu obedese ba legalidade sira ne’e. Ita presiza halo koordenasaun ida atu kontrolu no organiza instituisaun Estadu direta no indireta sira, ne’ebé presiza buka esforsu atu halo implementasaun ba iha reforsu sira,” nia akresenta.

Dekretu-Lei númeru 21/2021 kona-ba subsídiu mensál transporte ba kargu xefia ho objetivu atubele redús despeza Estadu ba uzu veíkulu Estadu.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here