Selebra loron mundiál labarik, Arsénio Bano husu inan-aman investe maka'as labarik sira-nia futuru. Imajen mídia ZEEMS.

OÉ-CUSSE, 02 Juñu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarte ne’e selebra loron mundiál labarik hamutuk ho labarik-sira iha monumentu jardín koreanu, Oébau, sub-rejiaun Pante Makasar.

Prezidente Autoridade RAEOA, Arsénio Paixão Bano, informa komemorasaun ne’e organiza hosi Gabineti Presidente Autoridade liuhosi Unidade Servisu Promosaun, Igualdade Jéneru Sosiál no Inkluzaun.

“Ita komemora loron mundiál direitu labarik sira-nian, ho objetivu atu fó onra ba lararik sira iha RAEOA no Timor-Leste tomak, ba eventu loron mundiál ne’e atu hatudu kompromisu hosi Autoridade hodi proteje-sira, no dezenvolve direitu labarik tuir Planu Estratéjiku Rejionál RAEOA 2019-2023, tán ne’e ita husu inan-aman sira atu investe maka’as ba labarik sira-nia futuru,” Arsénio Paixão Bano, ko’alia iha Oé-Cusse, kinta ne’e.

Komemorasaun loron mundiál labarik iha Rejiaun Administrativa Espesiál O¬e-Cusse Ambeno. Imajen mídia SEESM.

Ezekutivu ne’e fundamenta, tema jerál iha selebrasaun loron mundiál labarik iha Oé-Cusse, maka sensibilizasaun no edukasaun direitu labarik iha nível komunidade, signifika katak loron importante ba labarik iha Timor leste liuliu iha RAEOA, tenke prepara-aan estuda maka’as nune’e bele hadi’a RAEOA no Timor-Leste di’ak liután iha futuru.

“Ita hasoru ho labarik sira, hodi konvida mai hotu atu partisipa iha loron internasionál labarik nian, tanba iha mundu tomak mós halo selebrasaun, atu kongratula labarik sira hanesan jerasaun ba futuru nasaun nian,” nia afirma.

Nia enkoraja labarik-sira iha Oé-Cusse hamutuk, inan-aman inklui profesór sira, atu akompaña labarik sira preparativu ba futuru, no nafatin akompaña-sira atu fó motivasaun nafatin nune’e aban bainrua lori Oé-Cusse ba oin.

Atividade ne’ebé ajenda iha loron nasionál labarik nian ne’e, realiza ba labarik halo long-march hosi ponte Oesono to’o iha jardín monumentu koreanu Oébau, dansa suru boek, halai-karon, tata berlindu no pintura.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan