Estudante sira-ne'ebé partisipa iha komemorasaun loron mundiál ba labarik iha CCB, Vila Antiga, Baucau, kuarta (01/06). Imajen Tatoli/Natalino Belo.

BAUCAU, 01 juñu 2022 (TATOLI) – Fundasaun Uma Pas munisípiu Baucau, kuarta ne’e realiza animasaun no jogu hodi komemora loron mundiál ba labarik sira.

Diretora Ezekutiva Fundasaun Uma Pas Munisípiu Baucau, Felismina Belo, esplika, objetivu hosi animasaun mak atu inspira no fó hanoin ba labarik sira hodi prepara-aan di’ak liután iha futuru hanesan jerasaun kontinuadór.

Estudante sira tuir jogu tata berlindus parte hosi atividade hodi selebra loron mundiál ba labarik iha CCB, Vila Antiga, Baucau, kuarta (01/06). Imajen Tatoli/Natalino Belo.

“Ami kria jogu atu sira sente katak ohin loron espesiál ba sira,” Diretora Ezekutiva Fundasaun Uma Pas Munisípiu Baucau hateten iha Sentru Konvensaun Baucau (CCB, sigla portugés).

 

Atividade animasaun hanesan drama múzika ne’ebé ligada ho violénsia bazea ba jéneru, liuliu ba labarik sira, puizia inspirasaun inklui jogu tradisionál hanesan dada-tali, tata berlindus no tú kabas ba daun.

Partisipa iha selebrasaun loron mundiál ba labarik ne’ebé hala’o hosi Fundasaun Uma Pas Baucau estudante hamutuk na’in-100 no manorin-na’in sira 50 kompostu hosi reprezentante kada estudante iha Baucau vila hahú hosi eskola infantil to’o ensinu bázika.

Iha loron-tersa 31 maiu liubá, Fundasaun Uma Pas Baucau realiza semináriu ho tema ‘proteje labarik hodi halais aprovasaun ba lejislasaun hotu ne’ebé sensivel’ hodi selebra loron mundiál ba labarik ne’ebé kada tinan hala’o iha loron 1 juñu.

“Ami sei fahe prémiu ba eskola sira no ba sira-ne’ebé sai vensedór iha jogu ne’e,” Felismina Belo akresenta.

Fundasaun Uma Pas Baucau realiza atividade selebrasaun loron mundiál ba labarik hetan apoia orsamentu hosi United Nations Development Programme (UNDP) hamutuk orsamentu riun $2-resin

Uma Pas rejista violénsia hasoru labarik hamutuk na’in-lima iha tinan 2020 kompostu hosi kazu asédiu seksuál, asaltu seksuál no esprolasaun ne’ebé mak kolaborasaun ho Provedoria Direitu Umanu no Justisa (PDHJ, sigla portugés) hodi fó asisténsia legál.

Notísia relevante: Octaviano lidera munisípiu Baucau durante oras haat

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here