Prezidente Konsellu Administrasaun RTTL, E.P, José António Belo. Imajen TATOLI/António Gonçalves.

DILI, 01 junu 2022 (TATOLI)—Prezidente Konsellu Administrasaun Rádiu Televizaun Timor-Leste, Empreza Públika (RTTL, E.P), José António Belo, konvida Prezidente Repúblika, José Ramos Horta, atu bele partisipa iha selebrasaun aniversáriu RTTL, E.P ba dala-20 ne’ebé sei selebra iha 04 juñu 2022.

“Ohin ami RTTL mai kumprimenta Prezidente Repúblika, depois ami mós aprezenta RTTL ne’ebé sei selebra nia aniversáriu ba dala-20 ne’ebé sei akontese iha 04 junu agora, maibé loloos ne’e iha 20 maiu mas serimónia boot 20 maiu nian entaun itu muda tiha mai 04 juñu. Nune’e, ami mai konvida Prezidente Repúblika husu nia prezensa atu selebra hamutuk ho funsionáriu RTTL tomak,” José Belo hateten ba jornalista sira, iha Palásiu Prezidensiál Nicolau Lobato, Bairru Pite, Dili, kuarta ne’e.

Nune’e mós, iha aniversáriu ne’e RTTL, E.P sei konvida funsionáriu no eis-funsionáriu sei halo atividade reúne ida, hodi halibur kolega sira-ne’ebé servisu iha RTTL hosi tinan 1999 to’o mai agora sei selebra hamutuk aniversáriu RTTL, E.P ba dala-20 ne’e.

Iha sorumutu ne’e, Prezidente Repúblika José Ramos Horta hateten maske iha ajenda no programa barak maibé nia parte sei buka tempu atu bele partisipa serimónia aniversáriu RTTL, E.P ba dala-20 ne’e.

“Primeiru nia hateten, ein prinsipiu Prezidente sei haree nia programa maibé iha indikasaun forte nia sei ba partisipa no selebra hamutuk ho funsionariu RTTL, E.P sira,” nia dehan.

Prezidente Repúblika hato’o mensajen ba jerente no funsionáriu RTTL, E.P atu bele investe rekursu umanu no rejursu ekipamentu ne’ebé mak forte, nune’e bele hadi’a kualidade no prestasaun servisu iha RTTL nian.

“Iha 20 anu ne’e, RTTL mós sei halo lansamentu ruma tanba tinan 20 RTTL nafatin uza edifísiu tuan,” Prezidente RTTL, E.P ne’e hateten.

Iha selebrasaun aniversáriu RTTL, E.P ba dala-XX ne’e, Estadu no Governu sei halo lansamentu primeira pedra ba uma foun duni ne’ebé sei harii iha Caicoli, Dili, nune’e bele lori RTTL, E.P ne’ebé sei analog hela ba RTTL, E.P dijitál.

“Daudaun ne’e, ema hotu hatene, RTTL, E.P sei analog hela no seidauk dijitál. Maibé,  espera iha tinan ne’e nia-laran duni ita sei halo dijitalizasaun. Espera katak iha tinan 20 ne’e, bele iha ona ita-boot sira-nia ekran, ami mosu ho kualidade,” nia garante.

Istória RTTL, E.P

Rádiu no Televizaun Timor-Leste, Empreza Públika (RTTL, E.P) harii hosi misaun Organizasaun nasaun Unida (ONU) iha 2002 ho naran Rádiu Timor-Leste (RTL).

RTTL, E.P hahú nia knar hodi sai hanesan sentru informasaun hodi transmite informasaun ba públiku ho naran Rádiu UNAMET (United Nation Mission in East Timor) iha tina 1999. UNAMET hanesan misaun ONU nian ne’ebé reprezenta ONU iha Timor-Leste iha 1999 hodi halo preparasaun ba Konsulta Populár (referendu) ba determinasaun futuru nasaun Timor-Leste hosi okupasaun Indonézia.

Iha 2000, ONU habelar tan mídia komunikasaun hodi harii estasaun Televizaun Timor-Leste (TVTL) iha loron 20 fulan-maiu tinan 2002 iha serimónia restaurasaun proklamasaun independénsia Timor-Leste iha tasi-Tolu, Dili.

Iha tinan 2002, liuhosi dekretu-lei UNTAET Númeru 06/2002 estabelese servisu Públiku Rádiu Difuzaun Timor-Leste ne’ebé hamahon naran Rádiu no Televizaun Timor-Leste.

Iha Primeiru Guvernu Konstitusionál 2002, Rádiu Timor-Leste no Televizaun enfrenta dezafiu oioin tanba limitasaun orsamentu ne’ebé maihosi Governu.

Iha tinan 2003, Primeiru Governu Konstitusionál alerta iha regulamentu no iha lei númeru 02/2003 kona-ba kriasaun servisu públiku rádiu difuzaun.

Iha 2008, IV Governu Konstitusionál hamosu dekretu-lei númeru 42/2008 kona-ba aprovasaun Rádiu ho Televizaun Timor-Leste Empreza Públiku (RTTL, e,p).

Liuhosi dekretu-lei númeru 42/2008 RTTL sai hanesan primeiru Empreza Públiku iha RDTL ho nia vizaun; “Lidera Televoizaun Nasionál no transmisaun rádiu hodi promove unidade nasionál no armonia sosiál. Nu’udár transmisaun públiku, konfiansa no kreatividade sai nu’udar fundasaun baa mi servisu.”

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here