Prezidente Repúblika, José Ramos-Horta, enkontru ho responsavel Coperativa Cafe Timor (CCT) iha Palásiu Prezidente Nicolau Lobato, Bairru Pite, kuarta (01/06). Imajen Tatoli/Egas Cristóvão.

DILI, 01 juñu 2022 (TATOLI)—Prezidente Repúblika, José Ramos Horta, husu Koopertiva Kafé Timor (CCT, siglá portugés) atu loke kafetária ho kafé organiku Timor nian iha nasaun seluk iha rai-li’ur hodi promove produtu kafé Timor-Leste.

“Prezidente Repúblika hakarak liu-liu CCT promove kafé Timor ba merkadu hanesan loke kafetária iha rai-li’ur, exemplu hanesan iha Malázia no Singapura, se bele lori ba ne’eba,”  Diretór Jerál CCT, Xisto Moniz Piedade, hateten ba jornalista sira hafoin ramata enkontru ho Xefe Estadu iha Palásiu Prezidensiál, Bairru Pite, kuarta ne’e.

PR hakarak hasa’e produsaun kafé iha laran tanba kafé barak tuan ona, nune’e asegura sustentabilidade setór ne’e ba oin tanba kafé sai reseita daruak Timor-Leste nian.

Tuir Jerente CCT, loos duni kafé barak mak tuan ona no balun komesa kona moras ho mós iha mudansa klimátika, kafé ninia produsaun menus nune’e presiza iha tratamentu, tanba kafé uluk iha tempu portugés tonelada rihun 20 maibé agora to’o de’it tonelada rihun neen (6) iha esportasaun kada tinan.

“Nune’e, CCT hanoin primeiru ita hasa’e produsaun tanba bainhira produsaun la to’o, Ita bele promove ita-nia kafé iha rai-li’ur maibé derrepente ema husu kafé laiha, ita atu halo oinsá entaun parte CCT ho Governu servisu fó ideia hodi hasa’e produsaun,” nia hateten.

Iha tinan 2021, CCT esporta kafé hamutuk tonelada 350 barak liu ba nasaun Amérika, tuir mak Austrália ho Nova Zelândia, no tinan ne’e tanba produsaun menus nia alvu sei sosa kafé tonelada rihun 10 to’o 12 hosi agrikultór sira, maibé depende produsaun nune’e bele esporta de’it tonelada 160.

Maibé, nia dehan, presu kafé sai nafatin preokupasaun ba agrikultór kafé na’in dalabarak la motiva nune’e presiza determina presu justu.

“Iha enkontru Prezidente mós ko’alia presu kafé maibé ida-ne’e depende ba merkadu mundiál ne’ebé ami sosa hosi argikultór sira kada kilograma agora ho sentavu 41,” nia dehan.

Durante enkontru CCT ho PR ko’alia mós produtu seluk ne’ebé CCT hala’o iha setór agrikultura ninian no PR husu oinsá atu hasa’e ninia produsaun.

“Prezidente mós husu saida mak CCT halo tan alleinde kafé ne’ebé ami mós kuda klove (Jengkeh), baunilla no cokolate (kakau) ne’ebé ita kuda ona juta tolu iha territótiu nasionál no hanoin tinan hirak mai ita sei halo segundu esportasaun cokolate,” nia dehan.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here