Kaderneta Eskolár. Imajen/Espesiál

DILI, 01 juñu 2022 (TATOLI)—Gabinete Avaliasaun Dezenvolvimentu Kurrikulár (GADK) hosi Ministériu Edukasaun Juventude no Desportu (MEJD) hahú prodús ona kaderneta ba estudante sira iha nível ensinu báziku 1,2 siklu hamutuk 40.000.

Koordenadór GADK, Mateus dos Reis, hateten, kaderneta eskolár ne’ebé prodús ona, ba de’it estudante sira iha nível ensinu báziku 1,2 siklu, enkuantu ba estudante 3 siklu no sekundáriu iha hela no agora kontinua halo distribuisaun.

“Ami hahú prodús ona kaderneta eskolár ba ita-nia estudante sira iha nível ensinu báziku 1,2 siklu. Atividade produsaun ne’e halo ona iha sentru impresaun Comoro, atu nune’e ami bele distribui ba estudante sira iha territóriu nasionál,” Koordenadór GADK hateten ba Agência Tatoli, iha ninia knaar fatin, edifísiu MEJD, Vila verde, kuarta ne’e.

Notísia relevante: MEJD sei imprime kaderneta 200.000 resin ba estudante ensinu báziku

Polítika MEJD ba tinan ne’e sei prodús kaderneta eskolár ba estudante sira hamutuk 80.000, maibé haree mós ba kapasidade mákina produsaun iha sentru impresaun Comoro ne’e, la atende nesesidade GADK nian de’it maibé atende mós nesesidade MEJD nian tomak.

“Produsaun sei la halo dala-ida de’it, maibé la tuir faze ne’e duni prodús dahuluk sei atende kaderneta 40.000, hafoin remata ona maka sei kontinua prodús tan. Karik to’o totál númeru ne’ebé termina ona maka seidauk sufisiente maka MEJD liuhosi GADK sei hato’o rekomendasaun hodi halo tan produsaun. Portantu kaderneta ba estudante 3 siklu no sekundáriu nian tuir dadus iha 83.000, maibé ida-ne’e ba tinan kotuk nian,” nia akresenta.

Enkuantu, intensaun mak halo filafali produsaun ba kaderneta eskolár tanba mosu preokupasaun hosi inan-aman estudante sira ne’ebé kestiona estudante ida iha kedan kaderneta tolu.

“Ne’e prejudika liu, tanba ne’e GADK rekomenda ba MEJD hodi halo renovasaun. Agora kada estudante iha de’it kaderneta ida,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here