Eskola CAFE Viqueque selebra loron mundiál ho atividade desportiva, iha resintu eskola, Beloi, kuarta (01/06). Imajen Tatoli/Vitorino Lopes da Costa

VIQUEQUE, 01 juñu 2022 (TATOLI)—Eskola Referénsia Lian Portugés, Centros de Aprendizagem e Formação Escolar (CAFE) Viqueque, kuarta ne’e, realiza atividade desportiva iha ámbitu selebrasaun loron mundiál labarik.

“Ami ho inisiativa rasik hodi komemora loron mundiál ba labarik maka ami realiza atividade desportiva hodi anima estudante CAFE sira hosi pré-eskolár, ensinu báziku no sekundáriu,” Diretór Eskola CAFE,  Víctor de Carvalho, hateten ba Agência Tatoli, iha ninia knaar fatin, Eskola CAFE, Beloi, kuarta ne’e.

Tuir Víctor, tipu atividade prinsipál ba komemorasaun loron mundiál maka hanesan kompetisaun catur, papagaiu, futeból, jogu tradisonál, dada tali no seluk tan.

“Iha tinan ne’e labarik tama fali eskola, entaun komemorasaun loron mundiál ne’e envolve hotu estudante CAFE ho totál 660, ne’ebé hosi pre-eskolár to’o sekundáriu sira tenki partisipa atividade,” nia akresenta.

Notísia reletvante: Estudante Eskola CAFE Viqueque hamutuk 107 simu ona vasina Pfizer

Atividade ba komemorasaun loron mundiál ba labarik organiza hosi profesór timor-oan no Portugal hodi halo haksolok estudante sira.

“Estudante sira sente kontente no atividade ikus liu maka ami halo jogu futeból ba estudante sekundáriu. Ohin ami lansa papagaiu ba estudante sira, bainhira estudante sira ne’ebé nia papagaiu semo di’ak mak sei hetan prémiu hanesan kadernu no lapizera,” nia esplika.

Diretór CAFE  hato’o mensajen ba  labarik sira: “haksolok ba, maibé keta haluha estuda maka’as atu prepara imi-nia futuru ba nasaun Timor-Leste.”

Enkuantu, iha selebrasaun loron mundiál ba labarik ne’e, kada estudante ho papagaiu hodi halo kompetisaun, dada tali hodi festeza loron labarik.

Atividade ne’e hetan akompañamentu hosi profesór no inan-aman estudante CAFE Viqueque.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here