Prezidente Republika, José Ramos Horta, bainhira selebra loron mundial labarik nian iha Palásiu Prezidensiál Nicolau Lobato, Bairru Pite, kuarta (1 juñu 2022). Imajen Tatoli/Antonio Daciparu.

DILI, 01 juñu 2022 (TATOLI)—Prezidente Repúblika (PR), José Ramos Horta, kuarta ne’e, selebra loron mundiál ba labarik ho labarik sira iha Palásiu Prezidensiál Nicolau Lobato, Bairru Pite, Dili.

Labarik sira bainhira simu Prezidente Republika, José Ramos Horta, hodi selebra loron mundiál labarik iha palásiu prezidensiál Nicolau Lobato, Bairru Pite, kuarta (01 juñu 2022). Imajen Tatoli/Antonio Daciparu.

“Tanbasá mak ohin ita hasoru malu hamutuk iha ne’e hodi konvida imi mai. Tanba, ohin loron internasionál labarik sira-nian ne’ebé iha mundu tomak selebra. Nune’e, prezidensia marka loron ida-ne’e konvida imi mai to’o iha ne’e. Purtantu, loron espesiál imi-nian, nune’e parabéns ba imi,” PR Horta hateten bainhira selebra loron mundiál ne’e ba labarik lubun iha jardin áreadór Palásiu Prezidensiál.

Biban ne’e, Xefe Estadu no reprezenta ho labarik balun ko’a keek simbolikamente hodi komemora loron mundiál refere ne’ebé anima tebes labarik lubun bia prezensa ho kontente.

Hafoin ne’e, PR Ramos Horta fahe simbolikamente dose, sabraka, hudi inklui kadernu, bola no seluk tan ba labarik sira.

“Ohin prezidensia realiza komemorasaun loron mundiál ba labarik, hau hanoin ida ka rua-tolu mak mai maibé imi barak liu fali atus ba atus mak mai selebra loron boot ne’e,” PR Horta ko’alia ho hamnasa ba labarik sira.

“Ita Timor produtu oioin liu-liu ai-fuan hola parte edukasaun ita-nia labarik sira tenke han ai-fuan nutrisaun di’ak,” nia dehan.

Labarik feto, Martina dos Santos, tinan sia (9), sente kontente tanba bele komemora loron internasionál ba labarik ho Presidente Repúblika.

“Ha’u sente kontente mai iha Palásiu Prezidente hodi komemora loron labarik sira-nian ho Xefe Estadu,” nia hateten.

Entertantu, komemorasaun ne’e hetan partisipa labarik lubun ne’ebé hela besik iha areadór Palásiu Prezidensiál Nicolau Lobato, Bairru Pite.

Estadu presiza fó atensaun kombate má nutrisaun

Prezidente Repúblika, José Ramos Horta, hateten Estadu presiza fó atensaun kombate má nutrisaun iha rai-laran ba labarik no inan isin no populasaun ne’ebé kondisaun ki’ak.

Nune’e, nia parte ko’alia ona ho UNICEF atu dezenvolve programa no bele servisu hamutuk ho Governu hodi haree.

Prezidente Republika, José Ramos Horta, bainhira selebra loron mundial labarik nian iha Palásiu Prezidensiál Nicolau Lobato, Bairru Pite, kuarta (1 juñu 2022). Imajen Tatoli/Antonio Daciparu.

“Ha’u ko’alia ho UNICEF no Governu iha rai ida-ne’e ita iha osan labarik oan sira no ema ko’alia labele halmlaha. Ha’u kontinua diálogu ho UNICEF halo planu ne’ebé di’ak no ko’alia  mós ho embaixada Austrália, Korea, Xina ho sira seluk oinsá hadi’a edukasaun ba labarik sira, hadia merenda eskolár. Tan ne’e, se Governu apoiu programa UNICEF nian sub-programa nutrisaun infantil bele taka iha tinan lima nia laran,” nia hateten.

Ba Prezidénsia Repúblika, Ramos Horta, hateten hahú prepara planu hodi haree inan sira isin-rua no inan-faluk ho oan ki’ak sira.

“Inan sira isin-rua no inan ho oan ki’ak bele mai almosu iha ne’ebé maibé planu ida loloos labele rungu-ranga tanba prezidénsia mós iha limite. Tanba ida-ne’e hanesan kontribuisaun prezidénsia ba Governu tanba Governu la konsege rezolve buat hotu, nune’e prezidénsia buka halo buat ruma tulun Governu no Estadu ba labarik sira,” nia hateten.

PR konsidera labarik faan manu-tolun la’ós traballu infantil 

PR Horta la bolu labarik sira iha Timor-Leste ne’ebé faan manu-tolun hala’o traballu infantil tanba ida-ne’e hanoin sira oinsá aprende sai hanesan negosiante.

Prezidente Republika, José Ramos Horta, bainhira selebra loron mundial labarik nian iha Palásiu Prezidensiál Nicolau Lobato, Bairru Pite, kuarta (1 juñu 2022). Imajen Tatoli/Antonio Daciparu.

“Ema balun ko’alia traballu infantile, ha’u hatene traballu infantil tanba ha’u Prezidente ba grupu internasionál ida prémeu nobel da páz, líder mundiál ba direitu labarik sira-nian. Traballu infantil saida iha Timor, ha’u la bolu ne’e traballu infantil primeiru sira ba eskola komforme ba dadeer lorokraik sira faan manu-tolun no balun faan manu-tolun sira-nia inan nian rasik fó ba sira ba faan. Hanoin, faan manutolun la’ós servisu todan maibé desde labarik ne’e la falta eskola,” nia hateten.

Horta konsidera traballu infantil mak halo iha rai sira hanesan iha Bangladesh, Pakistaun, Índia, Amérika Latin, Afrika ne’e todan tebes krime ida.

“Maibé ha’u tau matan ba ida se labarik sira faan manu-tolun ka buat seluk ne’e la’ós todan sira ajuda iha uma maibé hanesan eskola ida ba sira kiik aprende kedas negósiu iha tinan lima ka neen tan sai bisnis-man. Tantu agora haree sira oinsá ajuda sira hodi tulun negósiu ne’e bele ajuda sira rasik tanba iha Amérika labarik balun ho tinan sia de’it milionáriu tiha ona,” nia dehan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here