Jetór Grupu Atema'ar Adukafa, Martinho Locateli Ornai. Imajen Tatoli/Francisco Sony

DILI, 01 juñu 2022 (TATOLI)—Grupu negósiu Atema’ar Adukafa, konsege dezenvolve ka haki’ak manu timór (ayam kampung) iha suku Buibau, postu administrativu Baucau vila, munisípiu Baucau, hafoin manán kompetisaun negósiu inovativu, ho totál finanseiru $8.607.

Kompetisaun ne’e hanesan projetu konjuntu entre Governu liuhosi Ministériu Turizmu Komérsiu no Indústria (MTKI) hamutuk ho Programa Nasaaun Unida Dezenvolvimentu (PNUD), hodi suporta joven kreativu sira ne’ebé hakarak dezenvolve negósiu.

Jestór grupu Atema’ar Adukafa, Martinho Locateli Hornai, konsidera kompetisaun ne’e di’ak tebes tanba bele hasa’e kapasidade halo negósiu.

“Prosesu kompetisaun negósiu inovativu ne’ebé ami tuir iha tinan 2021, ami aprezenta planu negósiu kona-ba atu haki’ak manu-timór iha parte finál nian no ikus mai ami hetan apoiu finanseiru $8.607 atu suporta ami-nia atividade, liuliu ba apoiu materiál,” Jerente grupu hateten ba Agência Tatoli, iha Sentru Konvesaun Dili (CCD, sigla portugés), kuarta ne’e.

Notísia relevante: Joven 25 selesionadu tama kampu treinamentu kompetisaun negósiu inovativu

Nia dehan, hafoin sira manán iha kompetisaun, halo vizita kedan ba empreza Movimentu Asaun Ekonimia Komunitária (MAKOM) ne’ebé na’in mak Rui Castro, hodi hetan esperiénsia hakiak manu-timór ho di’ak.

Daudaun, grupu ne’e nia atividade iha ona progresu, halo estensaun ba manu-luhan ho medida metru kuadradu 50×50 no parte oin sei halo luan liután tanba fatin ne’ebé uza hanesan rai privadu.

Grupu Atema’ar Adukafa iha traballadór hamutuk na’in-lima, ne’ebé ho fasilidade apoiu serbisu hanesan mákina inkubadora ho kapasidade akumula manu-tolun 500, mákina pellet, mákina dulas batar, jeradór, komputadór print no redi besi.

“Ho fasilidade ne’ebé iha, kada semana ami prodús manu-tolun timór 100 no ami fa’an rak ida $9, ne’ebé bele hetan $500. Ita presiza selu mós kustu operasionál inklui saláriu ba traballadór,” nia akresenta.

Jestór Projetu SEEWAY , Francelino Guterres. Imajen Tatoli/Francisco Sony

Nune’e mós, Jerente Projetu Apoiu Empreendedorizmu ba Feto no Joven (SEEWAY, sigla inglés) no PNUD, Francelino Guterres, hateten, kompetisaun negósiu inovativu ne’ebé antes ne’e hala’o iha tinan 2021, grupu emprezáriu sira konsege hetan apoiu finanseiru ho totál $200.000.

Joven kreativu sira ne’ebé manán iha kompetisaun negósiu inovativu ne’e dezenvolve negósiu iha setór produtivu sira hanesan agrikultura no peska, indústria transformasaun, indústria, turizmu, no teknolojia ai-han inovativu.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here