Ophthalmologist of the RACS Global Health in Timor-Leste, Manoj Sharma. Imajen Tatoli /Egas Cristóvão.

DILI, 01 juñu 2022 (TATOLI)—Royal Australian College of Surgeons (RACS) Global Health hosi Austrália durante ne’e liu hosi East Timor Eye Programe (ETEP) parseria servisu kooperasaun hamutuk ho Ministéiru Saúde (MS), fó ona tratamentu matan ba pasiente iha Timor-Leste rihun 100-resin.

“RACS nia existensia iha Timor-Leste liu tinan 20 ona. Durante ne’e servisu hamutuk ho Ministéiru Saúde hodi fó tratamentu matan ba pasiente ho problema matan, inklui leno, operasaun no tramentu ne’ebé to’o agora konsege fó ona tratamentu ba pasiente liu rihun 100,” Médiku Espesialista Matan hosi RACS Global Health, Manoj Sharma, hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál, Bairru Pite, kuarta ne’e.

Aleinde RACS implementa programa matan hala’o mós kapasitasaun ba médiku timor-oan sira iha nasionál to’o munisípiu.

“Rezultadu servisu ne’ebé hala’o ona fó kapasitasaun ba iha médiku jerál sira hodi hasa’e sira-nia nivél edukasaun no mós post gradusaun diploma iha área matan. Ha’u mai primeiru Timor-Leste iha 2013, momentu ne’ebá espesialista matan timor-oan foin na’in-ida. Maibé, agora iha ona timor-oan espesialista matan na’in-lima no iha mós post graduasaun diploma matán na’in-hitu ka ualu. Ida-ne’e mak progresu konsege to’o iha tinan hirak ne’e, servisu hamutuk ho Ministéiru Saúde no Hospitál Nasionál Guido Valedares (HNGV),” nia dehan.

Diretora Saude Global, Philipa Nichlonson, hateten hasoru malu ho Xefe Estadu ne’e ho objetivu relata servisu ne’ebé durante hala’o ho nia progresu no dezafiu sira.

Diretora Saude Global, Philipa Nichlonson. Imajen Tatoli /Egas Cristóvão.

“Enkontru ohin ho Prezidente Repúblika ko’alia kona-ba programa matan iha Timor-Leste hodi informa progresu servisu ne’ebé ami hala’o ho mós difikuldade ne’ebé ami hetan no mós kontinua atu oinsá apoiu programa refere,” nia hateten.

Tuir nia, dezafiu ne’ebé iha oinsa iha kapasitasaun matan mós ba pesoál enfermeiru sira iha Timor-Leste,  hasa’e kualidade pesoál saúde hodi oferese servisu saúde matan ne’ebé ho kualidade ba komunidade.

Enkuantu, tuir akordu kooperasaun ne’ebé iha RACS iha tinan tolu, mai implementasaun programa refere no sei ramata hodi hand over ka entrega fali ba Ministéiru Saúde atu bele kontinua.

Durante sorumutu, Xefe Estadu kontinua suporta no apresia servisu sira ne’ebé RACS durante ne’e presta ona no enkoraja maske ho dezafiu sira atu kontinua presta servisu importante  ba populasaun Timor-Leste.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here