DILI, 01 Juñu 2022 (TATOLI)— Fundasaun São João de Deus iha Timor-Leste kompromete apoia Ministériu Saúde liuhosi formasaun téknika ba profisionál saúde atu iha abilidade ba kuidadu saúde no jestaun lideransa.
“Ami kompromete apoia formasaun iha área promosaun lideransa ba Ministériu Saúde, atu mellora kompeténsia diretór-sira iha unidade hotu iha Hospital Nasionál Guidu Valadare e no ospitál referral-sira”, hateten Jestór Servisu Sosiál Fundasaun São João de Deus, Lourenço Camnahas, iha ámbitu lansamentu Programa ba Dezenvolvimento Enfermajen, Caicoli, Díli.
Fundasaun mós sei kontinua mellor kualidade ospitál-sira, nomeadamente foku ba akreditasaun unidade saúde-sira.
Iha biban hanesan, Diretora Saúde Internasionál ba Servisu Sosiál Fundasaun São João de Deus, Anthea Ramos, afiirma entre 2014 too 2018, organizasaun ne’e implementa ona Programa Dezenvolvimento ba Patolojia iha laboratóriu HNGV, Laboratóriu Nasionál Saúde no ospitál referral sira.
“Ami nia klínika foku liu ba unidade pediatria, neonatolojia no kuidadu intensivu, parteira no Enfremeiru liuhosi fornese treinamentu iha jestaun kurativu ne’ebé mak seguru no kontrola infesaun,” nia akresenta.
Entretantu, Ministra Saúde, Odete Maria Freitas Belo, hateten iha nesesidade duni ba formasaun ba profsionál saúde sira hodi mellora sira nia kompeténsia.
“Ami husu ita boot sira (fundasaun São João de Deus) nafatin kontinua apoiu kapasitasaun ho kualidade ba profisionál saúde sira atu hasa’e sira nia koñesimentu no abilidade iha área enfermajen nian iha Hospitál Nasionál Guido Valadares(HNGV) no ospitál referral-sira,” Ministra Saúde hateten.
Jornalista : Felicidade Ximenes
Editór : Florencio Miranda Ximenes
