Konkorrente na’in-lima hasai foto hamutuk ekipa juri, hafoin kompete kompetisaun lee poezia rezisténsia, iha AMRT, kuarta (01/06). Imajen Tatoli/Tomé Amado

DILI, 01 juñu 2022 (TATOLI)—Estudante 12o ano hosi Eskola Ensinu Sekundáriu Jerál (ESJ) 04 Setembru UNAMET Balide, Domingas da Costa Barros, sai primeiru lugár iha kompetisaun lee poezia rezisténsia iha ámbitu komemora tinan 20 restaurasaun independénsia.

Domingas haktuir, antes ne’e nia sente nervozu tanba eventu ne’e hanesan ikus ba nia hodi kompete ho konkorrente na’in-haat seluk, tanba nia hatene sira mós iha preparasaun di’ak.

“Ha’u sente ta’uk bainhira hamriik iha palku leten, tanba ha’u haree ema barak hateke loos mai ha’u. Ha’u koko taka matan hodi domina ha’u-nia an atu labele nakdedar hodi halo aprezentasaun ho di’ak, ikus mai ha’u konsege kalma hodi halo aprezentasaun ho hakmatek,” Domingas hateten hafoin ramata kompetisaun iha Arkivu no Muzeu Rezisténsia Timorense (AMRT), kuarta ne’e.

Notísia relevante: SEAK realiza kompetisaun poezia atu hametin kultura lee

Estudante ne’e rekoñese, preparasaun ne’ebé nia halo la másimu, tanba nia iha de’it loron-rua hodi prepara nia-an, hahú hosi sábadu no domingu, maibé ho esperiénsia ne’ebé nia iha ona, buka tan atu halo adaptasaun atu domina matéria sira, maski ho tempu limitadu, maibé nia konsege ultrapasa dezafiu no obstákulu sira.

Tuir vensedora ne’e, atu sai poetista la fasil tanba tenke iha vontade no tenke halo preparasaun di’ak, tanba hanesan ema ida atu lori audiénsia sira sente poezia nia furak, tanba ne’e poetista sira tenke integra-an tomak iha poezia ne’e, atu manán ka atrai audiénsia ninia valorizasaun ba poezia ne’e.

Iha biban hanesan, Prezidente ekipa juri, Alexandra de Araujo Tilman Sandra’, hateten, iha kompetisaun ida sempre iha manán no lakon, tanba ne’e ba sira ne’ebé lakon nu’udar pasu dahuluk atu loke dalan atu manán iha futuru.

“Labele ta’uk atu simu lakon, tanba hosi lakon maka sei aumenta esperiénsia hodi prepara di’ak liután iha futuru,” nia enkoraja.

Ho nune’e, ekipa juri liuhosi rezultadu ne’ebé anúnsia, hatudu katak konkorente na’in-lima ne’ebé kompete lee poezia rezisténsia ne’e, Domingas da Costa Barros sai primeiru klasifikasaun ho valór 1.470, Chioda Amaral hosi Eskola ESJ Canossa sai segundu lugar ho valór 1.298, Judith Romania de Jesus hosi Eskola ESJ 12 Novembru Becora nu’udar terseiru lugar ho valór 1.100, Fiorela Mota Cepeda hosi Eskola ESJ São Pedro Komoro ho valór 1.098 no ikus Arnaldo Izanio Horta hosi eskola ESJ São Pedro Comoro ho valór 990.

Atividade ne’e hanesan kontinuasaun programa AMRT hodi selebra tinan 20 restaurasaun independénsia 20 maiu, ne’ebé atividade ne’e halo ba estudante sira iha nível ensinu sekundáriu.

Nune’e, ekipa juri sente haksolok tanba atividade ne’e sei hamoris liután mundu literatura, liu-liu ba mundu poezia nian ba jerasaun foin-sa’e sira ne’ebé iha talentu.

Objetivu AMRT realiza atividade ne’e maka hakarak fó apresia eskola sira ne’ebé durante ne’e badinas halo vizita ba muzeu hodi haree no lee istória sira ne’ebé prezerva, ho nune’e fó oportunidade ba eskola hitu hodi partisipa iha kompetisaun, maibé hosi loron dahuluk konkorrente hamutuk na’in-ualu mak kompete, maibé iha kompetisaun ne’e juri elimina tiha ida no na’in-hitu mak tama ba faze daruak.

Hafoin iha kompetisaun loron daruak, ekipa juri elimina tan konkorrete na’in-rua no hela de’it na’in-lima, ikus ba faze finál, sira na’in-lima mak kompete.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here