Ekipa sanemaentu munisípiu Dili kontinua raut hela lixu ne’ebé komunidade soe iha estrada ibun iha área Comoro, tersa (18/01/2022). Imajen Tatoli/Antonio “Daciparu” Gonçalves.

DILI, 01 juñu 2022 (TATOLI)—Empreza Jacrilo Unipesoál, Lda, ne’ebé toma konta rekolla lixu iha área postu administrative Nain Feto ne’e, daudaun ne’e raut ona lixu ne’ebé bou aas iha merkadu Taibesi.

Notísia RelevanteJestór preokupa empreza la raut lixu iha merkadu Taibesi

http://www.tatoli.tl/2022/05/31/jestor-preokupa-empreza-la-raut-lixu-iha-merkadu-taibesi/

“Relasiona ho lixu ne’ebé iha Merkadu Taibesi la foti ne’e, iha tuku 11h00-resin horisehik kamioneta mai foti ona dala tolu iha fatin ne’ebá,” Diretór Empreza Jacrilo Unipesoál Lda, Jaime da Costa de Araujo, hateten ba Agência Tatoli, via telefónika, kuarta ne’e.

Tuir nia, Empreza Jacrilo Unipesoál, Lda, asina kontratu ho Autoridade Munisípiu Dili, hahú iha fevereiru 2022, ho atividade loro-loron raut lixu iha área postu administrative Nain Feto, Dili.

Iha kontratu ne’e hatene katak, kada kamionete loron ida rekolla lixu dala tolu, maibé iha domingu mak dala rua, entaun pesoál sira hahú foti lixu tuir Dekretu-Lei Governu nian katak hahú hosi 06h00 madrugada nia tenke lori ona lixu kamioneta ida ba Tibar, hafoin tuir mai rekolla fali lixu ba kamioneta daruak no datoluk nian.

“Entaun, ita-nia lixu iha Merkadu Taibesi nian seidauk foti tanba volume lixu iha ne’ebá makaas liu. Kamioneta foti hela lixu kamioneta dahuluk, nia lori dadaun ona ba Tibar, hafoin nia mai foti fali ba daruak, automátikamente lixu ne’e kontinua mai foti nafatin,” nia dehan.

Tanba, nia dehan, merkadu Taibesi ne’e fatin ida ba ema hotu-hotu mai halo atividade negósiu, entaun hotu-hotu ba soe lixu iha lixeira ne’ebé besik, nune’e kompañia bele hala’o atividade raut lixu tuir oráriu ne’ebé iha.

“Fatin ida-ne’ebé horisehik Autoridade Munisípiu Dili telefone ha’u, tuir loloos sira tenke hatene katak lixu ne’ebé sira koloka ona iha lixu laran ne’ebá iha fatin tolu ka haat, sira bandu ona labele soe lixu no hot-hotu tenke mai soe lixu iha estrada ibun besik dalan kurva nian, nune’e kareta bele mai foti,” Diretór Empreza ne’e afirma.

Problema ne’ebé mosu mak komunidade dala ruma so’e lixu la tuir nia oras no aat liután sira so’e lixu la tuir nia fatin, naran soe foer arbiru de’it.

“Fatin ne’ebé ita-nia Munisípiu Dili koloka ona, sira la ba so’e fali iha ne’ebá no sira mai soe fali rabat iha estrada ninin. Entaun, lixu ne’e kuandu tama ona iha estrada ninin ema haree ambiente la di’ak,” nia dehan.

Hosi ne’e, Empreza Jacrilo Unipesoál Lda, horisehik hasoru ona Jestór Merkadu Taibesi, atu monta pesoál ida besik lixu fatin, atu nune’e bele haree negosiánte sira soe lixu tuir nia fatin.

“Ami kompañia horisehik ba hasoru duni sira-nia Jestór Merkadu Taibesi, liu-liu ba lixu nian hateten karik (Jestór Merkadu) haruka pesoál ida hamriik iha lixu nian, nune’e komunidade mai soe lixu tuir nia fatin, ha’u hanoin laiha problema. Tanba, kamioneta sempre mai tula no iha ne’ebá ami koloka kamioneta rua. Dala ruma ami haree lixu makaas liu, ami tau kamioneta tolu iha ne’ebá, atu asegura lixu ne’e labele bou aas iha fatin ne’ebá,” nia dehan.

Entretantu, Governu, liuhosi Autoridade Munisípiu Dili kontratu Empreza Jacrilo Unipesoál Lda, tinan ne’e ho kamioneta 10, ne’ebé kobre lixu iha zona postu administrative Nain Feto ne’ebe kompostu hosi Merkadu Taibesi, Jardin Largo Lecidere, Bidau, Xanana Reading Room no selu-seluk.

Notísia RelevanteJestór Merkadu Taibesi Preokupa Ho Lixu

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here