Embaixadór Austrália, Bill Costello, foto hamutuk ho traballadór timor-oan na’in-67 ne’ebé tuir hela Pre Departure Briefing. Imajen/SEFOPE

DILI, 01 juñu 2022 (TATOLI)—Embaixadór Austrália iha Timor-Leste, Bill Costello, haksolok tanba timor-oan barak mak serbisu iha Austrália.

Diplomata australianu ne’e hato’o nia sentimentu bainhira akompaña Diretór Diresaun Nasionál Empregu Exteriór (DNEE), Filomeno Soares, hodi hala’o vizita ba traballadór timor-oan na’in-67, kompostu hosi mane 55 no feto 12, tuir programa Pre Departure Briefing (PDB).

“Governu Austrália haksolok haree Governu Timor-Leste mobiliza filafali joven timor-oan barak bá serbisu iha Austrália, hafoin mundu enfrenta pandemia COVID-19, Austrália kontinua presiza traballadór timor-oan bá serbisu iha Austrália tanba hatudu serbisu di’ak, maibé ha’u husu mós ba imi labele halai ses hosi sistema, nune’e imi nafatin iha kontrolu hosi adidu,” Embaixadór Bill Costello, hateten iha salaun STVJ, Camea Becora, kuarta ne’e.

Notísia relevante: Empreza Medfield planeia rekruta traballadór timor-oan 50 serbisu iha Austrália

Nune’e, diplomata ne’e enkoraja joven timor-oan sira, liuliu na’in-67 ne’ebé hetan ona oportunidade atu ba serbisu iha Austrália hatudu komportamentu serbisu di’ak, nune’e empregadór hosi Austrália bele emprega barak liután timor-oan sira.

Iha fatin hanesan, Diretór Diresaun Nasionál Empregu Exteriór, Filomeno Soares, agradese ba Embaixadór Australia ne’ebé disponibiliza nia tempu hodi bele ba vizita traballadór timor-oan nia atividade, atu nune’e bele fahe informasaun ba sira molok bá serbisu iha Austrália.

“Ha’u husu imi na’in-67 ne’ebé ohin partisipa iha programa ne’e, atu rona didi’ak informasaun ne’ebé Embaixadór fó hodi nune’e bá serbisu iha Austrália atu labele halai ses hosi sistema no hatudu komportamentu serbisu di’ak, tanba imi maka sai save ba susesu programa no haruka traballadór ba serbisu iha Austrália,” nia akresenta.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here