Ema ho Defisiénsia partisipa serimónia komemorasaun loron Restaurasaun Independénsia Timor-Leste ba dala XX, iha Palásiu Prezidensiál Nicolau Lobato, Bairru Pite, sesta (20 maiu 2022). Imajen Tatoli/Francisco Sony.

DILI, 01 juñu 2022 (TATOLI)—Koordenadór Nasionál Core Group Transparency-Timor-Leste (CGT-TL), Sabino Fitun, hateten Core Group Transparency Timor-Leste konsidera Orsamentu Jerál Estadu (OJE) 2022 la sensivel no inkluziva ba ema ho desifiénsia sira.

“Ami-nia haree OJE 2022 la sensivel no inkluziva ba ema ho defisiénsia hosi livru Orsamentu Jerál Estadu nia planu kada Ministériu hanesan Ministériu lima (5) ne’ebé ami foku, Ministériu Saúde, Edukasaun, Obras Públikas no MTK la prevee orsamentu ida ba parte ema ho defisiénsia,” Sabino Fitun hateten ba Agência Tatoli iha ámbitu media breafing kona-ba OJE 2022 la sensivel no inkluziva ba ema ho defisiénsia, iha edifisiu Core Group Transparancy-Timor-Leste, Caicoli, Dili, kuarta ne’e.

Tuir nia, ministériu sira-ne’e maske sira harii ona ekipa ida ba Planu Asaun Nasionál ba ema ho defisiénsia maibé sira nafatin seidauk sensivel iha sira-nia programa no planu ba orsamentu kada tinan.

“Ami hanoin katak ita-nia Governu ida-ne’e seidauk sensivel ba ema ho defisiénsia,” nia dehan.

Iha OJE 2022 ne’e, ministériu sira la prevee orsamentu tanba ne’e Organizasaun Naun Govermentál (NGO) Core Group Transparency-Timor-Leste haree katak Ministériu sira la espesífiku tau orsamentu ba ema ho defisiénsia iha sira-nia ministériu.

Tanba, sira-nia parte seidauk haree katak iha pursentu hirak mak sira tau iha ne’ebá, tanba ne’e ami orsamentu 2022 ne’e nafatin hanesan ho orsamentu sira tinan uluk nian, ne’ebé sira la tau prioridade ba asuntu ema ho defisiénsia liu-liu liga ba asesibilidade no inkluzaun ema ho defisiénsia.

“Ezemplu, iha Ministériu Edukasaun sei sira halo infraestrutura sira ba uma eskola, pelumenus sira prevee orsamentu iha ne’ebá hanesan rampa ba estudante sira-ne’ebé defisiénte uza kadeira roda maibé ida ne’e la tau. Foin daudaun ha’u vizita iha eskola Sergio Viera de Melo ne’ebé foin hetan reabilitasaun hosi tinan ne’e, sira nafatin la iha asesibilidade. Ho ida-ne’e hatudu katak ita-nia kompañia sira-ne’ebé halo BoQ (Bill of Quantity) entrega ba Ministériu relevante no Ministériu Obra Públika hanesan Ministériu ne’ebé haree BoQ no fim sira la haree ida-ne’e,” nia akresenta.

Iha tinan kotuk, Ministériu Obra Públika halo ona sirkulár ida ba ministériu hotu karik iha dezenvolvimentu sira tenke asesivel. Iha dezeña sira tenke tuir dezeña padraun Internasionál, maibé to’o agora haree katak iha Ministériu Edukasaun, Saúde, barak la asesivel.

“Ita-nia kolega defisiénsia ho karreta roda sira ba labele asesu iha eskola no sentru saúde sira. Alende ne’e, ita haree iha Ministériu nia edifisiu barak mak la asesivel, hanesan, ita haree iha Palásiu Governu, Palásiu Prezidente no mós Ministériu sira la asesivel. Tanba ne’e, ohin ami hala’o atividade media briefing, atu breafing kolega mídia sira atu hatene asuntu ne’e,” nia dehan.

Tanba, Core Group Transparency-Timor-Leste la husu sira atu halo dezenvolvimentu ba eskola ida ketak ba ema desifiénsia sira no la husu mós sira atu halo klínika ida própriu ba ema ho defisiénsia.
“Maibé, ita-nia hakarak pelemenus klínika no eskola ida-ne’ebé sira halo tenke iha asesibilidade. Tanba, ita haree estrada sira kuaze iha Dli laran nia trotoar sira sempre aas hotu. Alende ne’e, nia modelu dala ruma kloot ba to’o klaran luan fali, oinsá mak maluk defisiénsia sira bele asesu,” nia dehan.

Tanba ne’e, hakarak enkoraza Ministériu relevante sira atu ba oin iha planu orsamentu 2023, kada Ministériu iha ona hanoin, tau planu no tau orsamentu atu responde nesesidade ba ema ho defisiénsia.

“Tanba ne’e, ita hakarak ministériu relevante 11 ne’ebé hamutuk iha ekipa Planu Asaun Nasionál ba ema ho defisiénsia, kada ministériu pelemenu sira tau sira-nia orsamentu 1% iha ne’ebá,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here