Autoridade RAEOA inaugura iluminasaun eletrisidade ba benefisiáriu 119 iha Oésilo. Imajen Tatoli/Abílio Elo Nini.

OÉ-CUSSE, 01 Juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, kuarta ne’e ofisialmente halo inaugurasaun ba projetu instalasaun liña eletrisidade ba benefisiáriu uma-kain 119 ba suku tolu iha sub-rejiaun Oésilo.

Hosi benefisiáriu 119 ne’e, mai hosi suku Usitasa’e bairru izoladu Nakome hamutuk 23, suku Usitaqueno bairru izoladu Katu’i, Nitas no Fatu-Napan hamutuk 41, no iha suku Bobometo bairru izoladu Paut, Tuapenu no Oénoah hamutuk 55.

“Ita inaugura projetu eletrisidade ne’e atu haktuir promesa VIII Governu, no promesa hosi autoridade RAEOA hakarak komunidade iha Oé-Cusse asesu hotu ba ahi, tantu área urbana no fatin izoladu sira iha teritóriu Oé-Cusse, entaun ohin suku tolu ba oin sei laiha ona preokupasaun kona-ba ahi, ” Reprezentante Prezidente Autoridade RAEOA, António Hermenegildo da Costa, atuál Sekretáriu Rejionál ba Asuntu Terra no Propriedade, António Hermenegildo da Costa, ko’alia iha serimónia inaugurasaun ne’e.

Notísia relevante: RAEOA aloka millaun $1-resin instala liña eletrisidade iha sub-rejiaun haat

Autoridade RAEOA atu kompleta de’it iluminasaun eletrisidade ba populasaun iha territóriu Oé-Cusse, tanba uluk mandatu Mari Alkatiri, rezolve ona 95%, nune’e agora atu ba 100%, iha fatin balun seidauk hetan ahi, maibé autoridade sei rezolve hotu liuhosi solár painél.

“Intensaun ne’e hotu atu fasailita komunidade sira bele hala’o atividade ekonómia ho lais, ajuda estudante sira bele estuda ho di’ak no hamenus gastu ba komunidade, ohin suku tolu iha Oésilo, fulan oin sei halo mós inaugurasaun ba sub-rejiaun Pante Makasar, Nítibe no Pássabe,” nia hateten.

Nia apela ba komunidade-sira iha suku Usitasa’e, Uistaqueno no Bobometo atu serbisu hamutuk EDTL sira, bainhira presiza ekipamentu ruma atu halo instalasaun foun iha rezidénsia.

Xefe Departamentu EDTL Oé-Cusse, Armindo Mendonça, relata, projetu instalasaun iha sub-rejiaun Oésilo, empreza ezekuta iha fatin rua no instala mós trafo rua, atau fasilita komunidade sira iha fatin izoladu.

“Iha Usitasa’e iha bairru izoladu Nakome ho uma-kain-23, Usitaqueno bairru izoladu Nitas, Katui instala trafo ida ho uma-kain 41, no iha suku Bobometo iha bairru izoladu Oénoah, Tuapeno no Paut instala trafo ida ho uma-kain 55, ne’ebé benefisiáriu ba instalasaun foun ne’e hamutuk uma-kain 119, ho distánsia kilómetru tolu,” Xefe departementu ne’e relata ba komunidade no autoridade sira.

Diretór empreza Am-Lhichoe, Eurico da Rosa, informa, totál instalasaun liña nian tegangan menegah (medium voltage) hamutuk kilómetru tolu, kilómteru 1,5 iha suku Bobometo no kilómetru 1,5 iha suku Usitasa’e no Usitaqueno inklui liña tegangan rendah kilómetru 1,3.

“Ha’u agradese ba autoridade no tékniku EDTL tanba iha prosesu importasaun ne’e hetan difikuldade tanba maioria materiál hirak-ne’e 85% importa mai hosi nasaun viziñu iha situasaun pandemia, maibé liuhosi koordenasaun bele aselera serbisu tuir termu kontratu ne’ebé autoridade prevista ona iha dokumentu kontratu nian,” nia orgullu.

Xefe suku Usitaqueno, Fransisco Elo, agradese ba autoridade RAEOA, tanba ba dala uluk, mandatu autoridade períodu ne’e iha inisiativa hodi rezolve ona fatin izoladu sira atubele hetan naroman.

“Fatin ida-ne’e iha perténsia Usitaqueno, viziñu ho bairru Nakone suku Usitasa’e, fatin rua ne’e dezde tempu okupasaun to’o ohin, komunidade sei moris iha nakukun, maibé ho mandatu autoridade ne’e, hadomi tebes ami iha fatin izoladu sira atu fó tulun, ha’u lori ha’u-nia komunidade sub-rejiaun Oésilo agradese ba autoridade sira-nia esforsu,” autoridade lokál ne’e agradese.

Projetu instalasaun liña eletrisidade iha sub-rejiaun Oésilo, ezekuta hosi empreza Am-Lhichoe Unipesoál Lda, ho valór kontratu $328,450.07, prevee iha Orsamentu Jerál Estadu (OJE) 2021 ho durasaun kontratu loron 120.

Nune’e, empreze Am-Lhichoe halo instalasaun hosi bairru izoladu Tuapenu, Paut no Oénoah suku Bobometo, Nakome suku Usitasa’e, Katu’i, Nitas no Fatu Napan, suku Usitaqueno, perténsia sub-rejiaun Oésilo, hodi rezolve benefisiáriu hamutuk uma-kain 119 ho totál populasaun hamutuk 400-resin.

Notísia relevante: PA RAEOA hatuur fatuk dahuluk instala liña eletrisidade iha Oésilo

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here