Diretòr Patrimóniu no Lojistika Covalima, Ernesto da Cruz Mali. Imajen Tatoli/Celestina Teles.

COVALIMA, 01 juñu 2022 (TATOLI)–Diretór  Patrimóniu no Lojistika Covalima, Ernesto da Cruz Mali, hateten Administrasaun Munisípiu Covalima (AMC) liuhosi Dirasaun Património no Lojistika rejista patrimóniu Estadu motor 280 no karreta 42 ne’ebé funsionáriu públiku sira uza hodi hala’o servisu

“Administrasaun Munisípiu Covalima liuhosi Diresaun Patrimóniu no Lojistika iha Covalima rejista patrimóniu estadu hanesan motor 280 no karreta 42 ne’ebé mak funsionáriu sira uza hodi hala’o servisu,” Ernesto da Cruz Mali, informa ba Agência Tatoli, iha nia knar fatin, Kampung Baru, kuarta ne’e.

Diretór ne’e apela ba funsionáriu públiku sira uza karreta no motor Estadu, bazea ba regra ne’ebé estabelese ona mak funsionáriu públiku uza motor no karreta iha loron servisu, fora hosi oras servisu hanesan sábadu no domingu, labele uza.

“Bazea ba regra funsionáriu públiku sira uza karreta no motor uza iha oras servisu. Iha semana nia rohan hanesan sábadu no domingu, ita labele uza karreta no motor Estadu. Bainhira funsionáriu sira uza fora hosi oras servisu ne’e, ida-idak responzabiliza,” nia hateten.

Tanba, tuir nia, funsionáriu sira uza karreta no motor Estadu bainhira iha despaixu hosi administradór munisípiu Covalima maibé se laiha despiaxu karik labele uza arbiru.

Tuir dadus, karreta hamutuk 42 no hosi númeru ne’e karreta 14 tama ona iha prosesu leilaun, nune’e kareta 28 mak ativu uza hodi hala’o servisu. Aleinde rejista motor hamutuk 280 no hosi númeru iha tinan kotuk halo leilaun ba motor unidade 67. Tinan ne’e, sei halo leilaun ba motor 47, nune’e motor ativu uza hala’o servisu hamutuk 166.

Prosesu atu halo leilaun ba motor hirak ne’e, patrimóniu no lojistika iha Covalima haruka ona proposta ba iha nasionál sei iha prosesu verifikasaun, ne’ebé to’o ohin loron seidauk iha informasaun

Tanba prosesu leilaun hosi munisípiu haruka de’it proposta ba iha komisaun ne’ebé atu halo leilaun karreta no motorizada Estadu nia desizaun iha komisaun sira-nia liman.

Enkuantu Funsionáriu Públiku ho Ajente Administrasaun Públiku sira-ne’ebé kontinua utiliza karreta no motór Estadu iha loron feriadu nasionál sira no sábadu ho domingu, laiha karta autorizasaun, konsidera komete krime pekulatu ba uzu.

Tanba ne’e, nia dehan, sei aplika sansaun ne’ebé define iha artigu 9, Nú. 8/2003 inklui sansaun hirak hanesan bandu atu lori karreta Estadu durante fulan-ida (1) no koima $10, bandu atu halo kondusaun durante fulan-neen (6) no aplika koima $50.

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here