Sekretáriu Rejionál ba Asuntu Agrikultura, José Eta, vitiza traballu ba sentru viveru Oésilo. Imajen Tatoli/Abílio Elo Nini.

OÉ-CUSSE, 01 Juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Agrikultura, planeia sei integra ai-oan rihun-20 iha sentru viveru sub-rejiaun Oésilo, hodi fasilita komunidade atu halo reflorestasaun ba bee-matan sira iha suku Usitasa’e, Usitaqueno no Bobometu.

Sekretáriu Rejionál ba Asuntu Agrikultura, José Eta, informa, iha 2021 autoridade RAEOA liuhosi Sekretáriu Rejionál Agrikultura, estabelese sentru viveru komunitária rua, ida iha sub-rejiaun Nítibe iha suku Lela-Ufe no ida iha suku Bobometo, no tinan ida-ne’e sei harii-tán ida iha sub-rejiaun Pássabe.

“Objetivu hosi estabelesimentu sentru sentru viveru sira-ne’e atubele hakbesik liután, nesesidade komunidade, liuliu agrikultór-sira bainhira atu persiza ai-oan, atu kuda no halo reflorestasaun ba bee-matan sira-ne’ebé identifika ona, entaun iha sentru viveru Oésilo, daudaun ne’e ita prepara oan atu kuda ai-aon ho espésie oinoin hamutuk rihun-20,” José Eta, informa ba jornalista sira iha sentru viveru Oésilo, kuarta ne’e.

Nia afirma, sentru viveru iha sub-rejiaun Oésilo konstrui iha aldeia Tumin, suku Bobometo ho nia área kapasidade medida hamutuk metru 20×14, bele akumula espésie ai-oan rihun-20.

“Ita prepara de’it ai-oan ne’ebé nia tipu bele hakiak bee atu fó moris ba komunidade, hanesan futeras, aifuan-sira, atu kondiz ho poténsia ne’ebé iha suku no aldeia,” nia katak.

Komunidade Calisto Elo, nu’udar na’in ba kintál ne’e, orgullu tanba iha mandatu sekretáriu rejionál agrikultura dahuluk, instala ona embung ida atu fasilita komunidade uza bee iha tempu bailoron naruk, bele fó hemu animál inklui uza ba ortikultura.

“Tinan ne’e autoridade sira iha inisiativa mai harii sentru viveru ida iha ami-nia suku, ami kontente tanba ami presiza ai-oan, labele la’o dook ona hosi ne’e ba to’o Oé-Cusse vila, entaun sentru ida-ne’e bele fasilita ona ami, tanba bee-moos prepara ona,” nia orgullu.

Sentru viveru iha sub-rejiaun Oésilo ezekuta hosi empreza lokál Malbobos Unipesoál, Lda, ho valór kontratu hamutuk rihun $73,485.96, ne’ebé prevista iha Orsamentu Jerál Estadu (OJE) 2021 nian ho durasaun serbisu fulan tolu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here