Xefe Suku Motael, Luis António Viegas. Imajen/Espesiál.

DILI, 31 maiu 2022 (TATOLI)—Xefe Suku Motael, Postu Adminiatrativu Vera Crus, Munisípiu Dili, Luis António Viegas, agradese ba Governu tanba rekoñese ona Xefe Suku sira-nia sakrifisiu hodi hasa’e insentivu ba $250.

Notísia Relevante: PN aprova: saláriu xefe suku $140 hasa’e ba $250

“Ha’u agradese no sente kontente tanba Governu bele rekoñese ami no hasa’e ona ami-nia insentivu ka salariu ba $250,” Xefe Suku ne’e hateten ba Agência TATOLI, iha nia knaar fatin Motael, Dili, segunda ne’e.

Nia informa, nia parte simu ona informasaun konfirmadu hosi finansa katak insentivu ka salariu ba xefe suku sira agora sa’e aumenta.

“Konfirma ona ami-nia pedidu hosi ami-nia finansa katak kona-ba osan subvensaun ba Xefe Suku nian ne’e loos ona maibé ami sei simu iha fulan juñu depois sei simu dala ida ho janeiru nian to’o maiu ne’e,” nia esplika.

Entretantu, Xefe Suku husu Governu no Estadu ida-ne’e atu aumenta tan pontu ida ba estatutu suku nian kona-ba pensaun ka fó netik buat ruma bainhira mandatu ramata.

“Ami hakarak Estadu ida-ne’e rekoñese no konsidera ami-nia servisu hanesan xefe suku tanbasá mak ha’u ko’alia nune’e, tanba ami-nia kolega barak mak servisu tinan 20 ona maibé bainhira sai tiha hosi xefe suku laiha buat ida mak sira iha,” nia dehan.

Jornalista : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here