Formasaun ba ba membru VPU munisípiu 12 no RAEOA. Imajen/PNTL

DILI, 31 maiu 2022 (TATOLI)—Konsultór ba programa SpotLight ba Programa Dezenvolvimentu Nasaun Unida (UNDP), Ângelo Aparício, hateten, Uniaun Europeia apoiu rihun $6 ba formasaun sensível ba asuntu Violénsia Hasoru Feto no Labarik Feto (VHFLF) ho nia impaktu saúde mentál ba Polísia Nasionál Timor-Leste ba Ema ho Vulnerável (PNTL-VPU).

“Uniaun Europeia apoiu osan kuaze rihun $6 ba formasaun sensível ba asuntu Violénsia Hasoru Feto no Labarik Feto ho nia impaktu saúde mentál ba Polísia VPU sira atu hasa’e sira-nia koñesimentu no kapasidade atu bele atende violénsia oioin,” Ângelo hateten ba Agência TATOLI, hafoin fó formasaun kona-ba violénsia hasoru feto no labarik feto ho nia impaktu saúde mentál, iha City 8, Maleuana, Dili, tersa ne’e.

Nia hateten, formasaun ne’e atu oinsá ajuda hasa’e kapasidade no koñesimentu Ema ho Vulnerável sira atu iha sensível ba asuntu violénsia hasoru feto no labarik feto ho saúde mentál liu-liu feto sira-ne’ebé impaktu hosi violénsia.

Tanba, nia dehan, liuhosi formasaun ne’e bele loke dalan no aumenta sira-nia koñesimentu nune’e bele implementa iha terrenu bainhira atende violénsia sira.

“Iha formasaun ne’e, ami hanorin sira tanbasá violénsia afeta ba ema-nia saúde mentál, no trauma depois oinsá violénsia akontese entaun ami fó formasaun ba sira liu-liu parte justisa nian ne’ebé kolabora ho Polísia sira iha durante prosesu investigasaun,” nia esplika.

Iha formasaun loron dahuluk fó uluk oinsá komprende natureza violénsia hasoru feto no labarik feto ho nia impaktu saúde mentál, depois ko’alia mós kona-ba insestu no pedófila no iha loron daruak mak fó hanorin oinsá fó entrevista ba labarik kiik-oan sira no ema boot ne’ebé iha esperiénsia ho violénsia.

Formasaun seluk mak oinsá jere stress, tanba natureza servisu ne’ebé Polísia halo ne’e dala barak rona istória hosi ema todan hosi esperiénsia violénsia.

Formandu ba formasaun ne’e hamutuk 20 kompostu hosi mane na’in-lima no feto hamutuk na’in-15. Formandu sira-0ne’e hosi munisípiu 13, ezetu Rejiaun Administrativa Espesiál Oé-Cusse Ambeno (RAEOA) ho Ataúro, Covalima, Viqueque no Munisípiu Ermera.

“Ita-nia Polísia VPU reprezenta munisípiu kada ema na’in rua-rua. No hosi RAEOA ho Ataúro mak problema ró no RAEOA, Ermera no Viqueque mak ita-nia konvite tarde,” nia esplika.

Maibé nia dehan sei estende tan formasaun ba Polísia VPU sira liga ho violénsia hasoru feto no labarik ho nia impaktu saúde mentál. Formasaun ne’e servisu hamutuk ho UNDP no suporta hosi Uniaun Europeia (UE) liuhosi programa Spotlight nian.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here