Reitór UCT São João Paulo II, Joel Casimiro Pinto. Imajen TATOLI/Egas Cristóvão

DILI, 31 maiu 2022 (TATOLI)–Universidade Katólika Timorense (UCT) São João Paulo II, liuhosi Arsebispu Metropolitana Dioseze Dili, Don Virgílio do Carmo da Silva, tersa ne’e, fó pose ba dekanu no koordenadór hodi asume responsabilidade no tau-matan ba fakuldade no kursu sira ne’ebé eziste.

“Ohin tempu importante tebes ba Universidade Katólika Timorense São João Pauli II tanba realiza ona serimónia pose dekanu no koordenadór ba kursu sira, hosi dekanu fakuldade edukasaun literatura no arte, fakuldade siénsia umana no fakuldade siénsia medika, enkuantu dekanu fakuldade enjeñaria agríkola mak seidauk simu pose tanba seidauk iha tempu,” Reitór UCT-SJP II, Padre Joel Casimiro Pinto, relata iha serimónia pose, iha kampus sentrál, Balide.

Notísia relevante: Arsebispu Dom Virgílio husu Dirijente Universidade Katólika serbisu ekipa

Tuir Reitór, iha ona kursu balun maka ohin koordenadór sira simu ona pose, hanesan kursu siénsia ezata, literatura ka lian portugés, jestaun emprezariál inklui kursu direitu. Agora kursu ne’ebé seidauk iha koordenadór maka kontabilidade jestaun públika, jeografia no istória.

Nune’e, dekanu na’in-tolu mak simu ona pose no hela de’it ida mak sei interinu hela, ne’ebé pose ba koordenadór sira sei konstinua iha faze daruak.

UCT iha kursu 10 maibé koordenadór kursu tolu mak simu ona pose no hela hitu mak seidauk.

Nia konfesa, dekanu no koordenadór sira ne’e molok atu hetan konfiansa hodi asume knaar sira, universidade halo uluk entrevista ho sira atu hatene koñesimentu no abilidade, nune’e bainhira fakuldade ka kursu sira iha difikuldade ruma sira bele iha meiu hodi rezolve problema.

“Ita halo entrevista ho koordenadór sira ne’e hodi husu sira-nia disponibilidade tempu atubele hola parte iha prosesu ensinu aprendizajen ne’ebé hala’o iha UCT,” nia tenik.

UCT São João Paulo II ninia ezisténsia hahú iha loron 18 dezembru 2021, hafoin hahú kedan ho inskrisaun ba estudante sira no prosesu ba semestre pre-universidade.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here