Kondisaun Eskola EBF Mamulak Viqueque, kinta (26/05). Imajen Tatoli/Vitorino Lopes da Costa

VIQUEQUE, 31 maiu 2022 (TATOLI)–Diretór Servisu Edukasaun munisípiu Viqueque, Emídio Amaral, husu fornesedór kontrola hahán sira hosi programa merenda eskolár hodi labele fó impaktu ba estudante sira-nia saúde.

“Foin lalais estudante hosi Eskola Ensinu Báziku Filiál (EBF) Mamulak hamutuk na’in-30 maka hetan moras. Hahán sira ne’e lori ona bá laboratóriu hodi halo teste, maibé rezultadu seidauk sai. Ita tenke atensaun ba buat sira-ne’e,” Diretór hateten ba Agência Tatoli, iha ninia knaar fatin, Beloi, tersa ne’e.

Notísia relevante: Eskola EBF Mamulak Viqueque provizóriu suspende atividade merenda eskolár

Nia husu responsável sira bainhira prepara hahán ba estudante sira tenki kuidadu, nune’e labele fó impaktu ba estudante sira.

“Karik ba sosa sasán tenke haree ninia prazu, labele sosa arbiru, tenki lee lai maka sosa atu fó ba estudante sira han karik di’ak,” Emídio hameno.

Ho akontesimentu ne’e, Eskola EBF Mamulak daudaun ne’e suspende provizóriu programa merenda eskolár hodi hein teste amostra hahán ne’ebé estudante sira konsumu, enkuantu Eskola Báziku 18 no Filiál sira kontinua implementa programa ne’e.

“Iha sábadu (28/05), ha’u rasik tun ba eskola sira ne’ebé implementa programa merenda eskolár hodi fó hatene ba diretór eskola no fornesedór sira atu prepara hahán ho kuidadu,” nia tenik.

Menu merenda eskolár daudaun ne’e sei kontinua hanesan antes ne’e, iha ikan, manu-tolun, na’an, modo mostarda, koto no fehuk ropa.

“Menu ba merenda eskolár nian ita sei uza menu anteriór nian, tanba menu foun parte saúde seidauk oferese ba ami, maibé iha tempu badak sira sei fó, entaun ami sei uza menu foun,” Diretór dehan.

Iha loron 25 maiu estudante hosi Eskola EBF Mamulak na’in-30 sente kabun moras, muta to’o baixa iha internamentu Viqueque tanba deskonfia konsumu hahán merenda eskolár, maibé daudaun ne’e estudante sira rekupera hotu ona.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here