Diretor SEFOPE Muinisípiu Bobonaro, Calisto Mau-Ati. Imajen Tatoli/Sérgio da Cruz.

BOBONARO, 31 maiu 2022 (TATOLI) – Diretór Sekretaria Estadu Formasaun Profesionál no Empregu (SEFOPE) Munisípiu Bobonaro, Cailisto ‘Mau-Ati’, fó-sai katak iha  tinan ne’e simu ona proposta programa auto-empregu hosi grupu 12 ne’ebé submete dukumentu iha fulan hirak liubá.

Iha fulan hirak liubá SEFOPE aviza iha esfísiu no publika iha mídia sosiál facebook ba grupu hotu, liuliu joven sira-ne’ebé interesante atu asesu ba programa ne’e, no iha momentu ne’ebá iha grupu besik 20 mak foti formuláriu.

Maibé iha grupu besik 10 mak la konsege hatama sira-nia proposta atu kompete iha prograna ne’e tanba seidauk prienxe kritéria no rekizitu ne’ebé taka sai ona.

“Ami hahú atendimentu ne’e iha kedas janeiru to’o marsu ne’e, maibé iha tinan ida-ne’e ita simu de’it proposta hosi Grupu 12 atu asesu ba programa auto-empregu tanba kompleta ona kritéria sira-ne’ebé ami taka sai ona,” Nia informa ba jornalista Tatoli iha kna’ar fatin, Soso, Maliana, tersa ne’e.

Grupu 12 ne’ebé submete proposta ne’e ida mai hosi postu administrativu Atabae no Cailaco ida no restante hosi kapitál Maliana ne’ebé mai ho sira-0nia atividade sira hanesan, hakiak fahi grupu ida, ofisina ka bengkel grupu haat, karpintária rua, rental ida, hakiak ikan rua no ida seluk ninia atividade kona-bá prosesamentu tahu no tempe.

Nia dehan, daudaun ne’e ekipa tékniku hosi nasionál no munisípiu sira tún ba baze halo avaliasaun ba grupu 12 ne’ebé liu ona faze selesaun dukumentu, atu idak-idak nia atividade iha terrenu la’o ho di’ak ka lae, tanba tuir kritéria  ba programa ne’e kualkér grupu benifísiariu sira halo nia atividade pelumenus tenke la’o mínimu fulan-neen no másimu tinan ida ba leten.

Calisto informa, rezultadu hosi avaliasaun ne’e konklui ona no daudaun ne’e ekipa sira subemete ona ba nasionál atu halo avaliasaun finál ba proposta hirak-ne’e.

“Prosesu avaliasaun ne’e la’ós envolve ema ida de’it, tanba parte munisípiu mós sei tún ba hotu hamutuk sira iha nasionál sai membru, orsida liuhosi diskusaun membru ne’e nia mak hasai desisaun koletiva katak proposta hirak-ne’e pasa ka la pasa,” nia subliña.

Diretór ne’e akresenta, posiblidade bainhira konklui prosesu avaliasaun iha fulan-juñu no jullu sei bolu grupu ne’ebé sai benifisiáriu atu asina kontratu nune’e bele hetan apoia orsamentu bazea ba pedidiu ne’ebé submete.

Enkuantu ba sira-ne’ebé la pasa SEFOPE sei fó oportunidade hadi’a fali proposta atubele kompete iha tempu tuir mai.

Programa ne’e hanesan planu anuál SEFOPE nia implementa kada tinan ho objetivu atu dezenvolve ema-nia kreativdade hodi hadi’ak ekonomia família no rai laran, maibé durante implementa programa ne’e iha grupu barak, liuliu iha postu administratartivu sira la asesu ba programa ne’e.

“Ba oin meiu ida-ne’e ami sei uza mak hakbesik-aan ba administrador postu sira-ne’e taka avizu iha sira-nia fatin, atu iha enkontru ruma ho xefe suku sira bele hato’o ba sira kona-bá programa ne’e, depois líder komunitária hatún fali ba komunidade ne’ebé iha interese atu asesu,” nia katak.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here