Konsellu Veteranu RAEOA, Martinho da Cunha. Imajen Tatoli/Abílio Elo Nini.

OÉ-CUSSE, 31 maiu 2022 (TATOLI) – Konsellu Veteranu iha Rejiaun Administrativa Espesiál Oé-Cusse Ambeno (RAEOA), Martinho da Cunha ‘Mala’, hateten rekursu naturál iha munisipál sai fatór determinante iha implementasaun lei podér lokál no desentralizasaun administrativu iha futuru.

“Agora ita-nia reseita própriu mai hosi ita-nia rikeza sira iha Oé-Cusse, to’o agora ita seidauk iha hanesan fatuk no rai-henek, maibé ita espera karik Governu Sentrál fó duni podér mai munisípiu presiza dezenvolve asuntu ne’e, liuliu ba grande projetu sira presiza kontribui ba kofre Estadu,” Sekretáriu Sub-Rejiaun Haksolok ko’alia iha Oé-Cusse, tersa ne’e.

Iha 2011, Primeiru Ministru, Kay Rala Xanana Gusmão, haleu munisípiu 13 inklui Rejiaun Administrativa Espesiál Oe-Cusse Ambeno (RAEOA), hodi konsulta kona-ba vantajen no importánsia sira hosi podér lokál ne’e.

Nune’e iha tinan 2022, Parlamentu Nasionál liuhosi Komisaun A ne’ebé trata asuntu Konstitusionál no Justisa hamutuk ho Ministériu Administrasaun Estatal (MAE) haleu munisípiu sira liuhosi audiénsia públika, hodi rona opiniaun sira molok aprova lei númeru 23/2021, loron 10 novembru kona-ba lei podér lokál no desentralizasaun administrativa, no lei númeru 22/2021, loron 4 novembru kona-ba lei eleitorál munisipál.

Maibé Sekretáriu Sub-Rejiaun Haksolok ne’e husu Governu Sentrál halo tán konsulta públika molok implementa lei podér lokál no desentralizasaun administrative.

“Ita-nia podér Lokál labele tún direitamente hosi leten, maibé rona didi’ak lian hosi munisípiu antes tama ba faze implementasaun,” nia fó hanoin.

Nu’udar Konsellu Veteranu iha RAEOA, orgullu tanba lei númeru 23/2021, loron 10 novembru kona-ba Lei Podér Lokál no DeSentralizasaun Administrativa, no lei númeru 22/2021, loron 4 novembru kona-ba Lei Eleitórál Munisípál promulga ona hosi Prezidente Repúblika, tanba lei ne’e fó podér tomak ba munisípiu atu dezenvolve rasik poténsia sira iha munisípiu.

Konstituisaun Repúblika Demokrátika Timor-Leste, prevee organizasaun Administrativa Públika ne’ebé obedeseba prinsípiu deSentralizasaun administrativu. Objetivu hosi lei ne’e atu estabelese organizasaun, kompozisaun no kompeténsia órgaun Podér Lokál, inklui kuadru jurídiku deSentralizasaun administrativa Estadu nian.

Órgaun ne’ebé atu implementa lei ne’e komposta hosi Asembleia Munisipál, Prezidente Munisípiu no Vise-Prezidente Munisípiu. Tanba lei ne’e desentraliza podér tomak ba munisípiu no lei eleitorál munisipál, ne’e sei iha parlamentu lokál rasik, prezidente autoridade rasik, mak sei jere administrativamente, maibé rekursu umanu no rekursu finanseira tenke garantia.

Konsellu Veteranu ne’e afirma, sekarik iha futuru Governu implementa duni lei hirak-ne’e, parte Konsellu iha Oé-Cusse, preparasaun ne’e mak sei kontribui fó hanoin ba oinsa fó susesu ba konstrusaun Estadu ne’e, no Konsellu Veteranu mós prepara nia rekursu humanu atu kompete.

“Ne’e klaru ema hotu-hotu sei fó hanoin, la’os Konsellu Veteranu de’it, hakarak kompete ita prepara rekursu atu envolve, tanba ita hotu hakarak lori rai ne’e sai hosi susar no terus, tanba ita mesak mak jere rasik ita-nia munisípiu,” nia afirma.

Governu no Parlamentu Nasionál aprova lei Podér Lokál no Dezentralizasaun Administrativa tanba Konstituisaun RDTL artigu 5 (Desentralizasaun) hatete Estadu respeita, iha nia organizasaun rai-laran nian, kona-ba prinsípiu atu fahe kbiit Administrasaun Públika nian.

Nune’e mós artigu 72 (Podér Lokál) hosi Konstituisaun RDTL dehan, sei harii kbiit lokál ho ema ne’ebé koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian kona-ba solusaun problema rasik iha sira-nia komunidade no atu promove dezenvolvimentu lokál no la afeta partisipasaun Estadu nian.

Martinho da Cunha informa, implementasaun Lei Podér Lokál no Desentralizasaun Administrativa ne’e, reseita atu kontribui ba kofre Estadu iha Oé-Cusse ne’e, durante ne’e, reseita barakliu mai hosi importasaun liuhosi fronteira terrestre tanba Oé-Cusse iha kedas fronteira terrestre haat, Oésilo, Pássabe Nítibe no Sakato, Pante Makasar.

Aliende ne’e mós, reseita rai laran hanesan, Departamentu Transporte Terrestre no Komunikasaun no Eletrisidade Timor-Leste.

Nia fundamenta, kontribuisaun Konsellu Veteranu iha implementasaun lei podér lokál no desentralizasaun administrativa, durante ne’e Konsellu Veteranu hamrik iha Oé-Cusse, seidauk hola parte iha prosesu dezenvolvimentu ne’e, maibé agora hanoin ba futuru.

“Konserteza ita sei fó hanoin mós ba dezenvolvimentu futuru Oé-Cusse nian, agora daudaun ita prepara duni, hosi Konsellu Veteranu iha ekipa kiik-oan ida, ne’ebé atu prepara formula planu estratéjiku ba prosesu dezenvolvimentu ba futuru Oé-Cusse, ida-ne’e ita preparadu,” nia fundamenta.

Nia sujere atu susesu iha implementasaun lei podér lokál no dezentralizasaun administrativa, presiza kontribuisaun hosi sidadaun hotu ho organizasaun hotu tantu sosiedade sivíl, igreja, akadémiku, autoridade komunitáriu no seluk tán.

“Prinsipál liu maka rekursu umanu, maibé kontribuisaun ne’e ita hotu-nian, labele iha prátika kór polítiku, relijiaun tenke halakon diskriminasaun, ida-ne’e maka xave atu susesu iha implementasaun podér lokál ne’e,” nia fó hanoin.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here