Prezidente Repúlika José Ramos Horta. Imajen Tatoli/Francisco Sony.

DILI, 31 maiu 2022 (TATOLI)—Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, akompaña hosi embaixadór na’in-28 ne’ebé rezidente iha embaixada Timor-Leste nian iha ra-li’ur, tersa ne’e, hala’o sorumutu ho Prezidente Repúblika, José Ramos Horta.

Govenante ne’e hateten, hosi reuniaun ne’e Prezidente Repúblika, José Ramos Horta, husu ba embaixadór sira atu atrai investidór sira atu tulun Governu iha rekuperasaun no diversifikasaun ekonómika.

“Ami ko’alia kona-ba tópiku prinsipál hosi reuniaun koordenasaun ne’e Prezidente Repúblika husu embaixadór sira hala’o nia papel hodi atrai no lori investidór sira no mós ajuda Governu iha rekoperasaun ekonómika no diversifikasaun ekonómika,” Adaljiza Magno hateten ba jornalista sira hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite.

Xefe Estadu fahe esperiénsia ba diplomata sira oinsá papel embaixadór nian atu halo hodi hamorin nasaun iha mundu no oinsá dada investór atu investe iha rai-laran.

Durante sorumutu embaixadór sira atualiza rezultadu servisu ba Prezidente Repúblika no mós simu orientasaun polítika externa hosi Xefe Estadu.

Governante ne’e hateten, diplomata timor-oan na’in-28 ne’e iha ona Timor-Leste atu partisipa  reuniaun koordenasaun ho MNEK no entre embaixadór sira.

Jornalista : Nelson de Sousa 

Editór      : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here