Prezidente Timor-Leste Press Union (TLPU), Candido Alves, ho nia ekipa hala’o audiénsia ho Prezidente Repúblika (PR), José Ramos Horta. Imajen/Mídia PR.

DILI, 31 maiu 2022 (TATOLI)—Prezidente Timor-Leste Press Union (TLPU), Candido Alves, akompaña ho ekipa, tersa ne’e, hala’o audiénsia ho Prezidente Repúblika (PR), José Ramos Horta, hodi hato’o difikuldade sira ne’ebé hasoru no oinsá bele iha formasaun ba jornalista sira.

“Ita husu formasaun lian inglés no portugés, durante ne’e ita sente katak  sei menus entaun Prezidente Repúblika promete sei ko’alia ho Lorsa’e English Language Institute (LELI) no Institutu Camões atu buka dalan oinsa bele fó formasaun ba jornalista sira, nune’e bele aumenta jornalista sira-nia kapasidade,” Candido Alves hateten ba jornalista sira hafoin ramata enkontru ho PR iha Palásiu Prezidensiál Nicolau Lobato, Bairru Pite.

Aleinde ne’e, nia husu oinsá atu jornalista sira bele hetan formasaun liu-liu ba protokolu no jornalista destaka área kobertura iha Palásiu Prezidensiál atu bele iha fatin ida ba sira, nune’e hala’o servisu tanba loro-loron sira kobertura ka servisu kobre iha Palásiu Prezidensiál.

Durante sormutu, Xefe Estadu promote sei hato’o ba Governu atu nune’e bele buka fatin ne’ebé dignu ba TLPU.

PR fó resposta pozitivu katak sei tau atensaun hodi tau fatin ne’ebé estabelese iha Palásiu Prezidensiál ho fasilidade komputadór, internet, no mós bele prepara ai-han meudia nian ba jornalista destakadu.

Enkuantu, TLPU hanesan organizasaun ka asosiasaun ne’ebé fó mahon ba jornalista timor-oan tomak atu promove no defende direitu jornalista sira nian,  ne’ebé ho prinsípiu defende direitu jornalista no halo advokasia ba liberdade imprensa hodi hametin demokrásia ne’ebé garante ona iha konstituisaun artigu 40 no 41 ne’ebé ko’alia kona-ba promove direitu sira asesu informasaun nian no direitu ba jornalista atu halo kobertura ne’ebé defende lia-loos.

Dadaun ne’e, TLPU iha membru besik 300 ne’ebé hala’o knar orgaun komunikasaun sosiál oioin iha rai-laran hanesan imprime, eletrónika no online.

Enterantu, enkontru refere akompaña mós estrutura TLPU nian kompostu hosi Vise Prezidente TLPU, Umbelina Amaral, Sekretáriu Jerál TLPU, Marcelino Bata,  Koordenador Asuntu Externa, Rafael Ximenes Belo, Vise Koordenador Asuntu Advokasia, Florençio Miranda Ximenes, inklui membru balun.

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here