Semináriu kona-ba ‘igualdade jéneru, konseitu no implementasaun’, iha salaun INAP, Comoro, tersa (31/05). Imajen Tatoli/Isaura Lemos

DILI, 31 maiu 2022 (TATOLI)—Ministériu Ensinu Superior Siénsia no Kultura (MESSK) realiza semináriu kona-ba ‘igualdade jéneru, konseitu no implementasaun,’ tersa ne’e, ho konsiderasaun asuntu igualdade jéneru pertinente atu aplika iha ministériu sira.

Tuir Diretór Jerál Administrasaun Finansa MESSK, Hernánio da Costa Soares, konseitu implementasaun igualdade jéneru hanesan asuntu ne’ebé Estadu no Governu adopta atu promove no implementa iha setór hotu, tanba ne’e ministériu rasik hakarak fó oportunidade hodi promove no dezenvolve konseitu no implementasaun igualdade jéneru ba ninia funsionáriu sira inklui instituisaun Ensinu Superiór Públiku Privadu sira iha Timor-Leste.

“Intensaun hosi Estadu no Governu Timor-Leste adopta sistema igualdade jéneru mak atu fó importánsia ba feto Timor-Leste atu labele beibeik iha kotuk, maibé tempu to’o ona atu hamriik mós iha oin hodi kompete ho mane sira hodi diskute no fó mós opiniaun konstrutivu sira ba interese nasionál, Estadu no povu nian,” Diretór dehan ba Agência Tatoli, iha salaun INAP, tersa ne’e.

Notísia relevante: MESSK ezekuta ona 30,5% OJE 2022

Tanba ne’e, intensaun tau iha konseitu implementasaun igualdade jéneru ne’e mak oinsá atu fó biban hanesan ba feto no mane hamutuk hodi kontribui ba dezenvolvimentu nasionál, liuhosi tratamentu hanesan iha ministériu sira kona-ba asuntu igualdade jéneru.

Daudaun ne’e, MESSK halo hela promosaun ba funsionáriu feto sira tanba ministériu ne’e rasik  iha kargu xefia hamutuk 50, kompostu hosi feto 15 no mane 35 mane, enkuantu kargu méritu MESSK iha totál funsionáriu hamutuk na’in-481 no hosi totál ne’e iha funsionáriu feto 180 mai hosi nível no grau oin-oin.

Aleinde ne’e, Sekretária Ezekutiva Komisaun Funsaun Públiku (KFP), Maria da Costa Oliveira, hateten, dadus hosi KFP hatudu katak iha tinan 2021, iha funsionáriu públiku ein jerál 35.312, maibé númeru okupante kargu diresaun no xefia iha Funsaun Publika hosi mane 78% no feto 22%.

Nune’e mós, Provedora Adjuntu ba área Direitu Umanu, Benícia Erina Magno, konfesa katak Konstituisaun sai nu’udar lei inan ne’ebé hatuur ona norma promosaun ba feto profisionál hanesan elementu ida hosi direitu no garantia fundamentál.

Tanba ne’e maka tenke iha regulamentu forte atubele garante direitu hanesan ba feto no mane, atu nune’e bele garante liután asuntu igualdade jéneru iha mundu profisionál.

“Hosi Konstituisaun sira ne’e hatuur ona regra fundamentál ba promosaun feto iha mundu profisionál, ne’ebé ko’alia kona-ba igualdade no kualidade, katak sidadaun hotu hanesan iha lei nia okos, laiha ema ida maka hetan presaun kona-ba nia kór, rasa, sexu no laiha ema ida mak hetan diskriminasaun,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here