Diretora Plan Internasionál iha Timor-Leste, Dillyana Ximenes. Imajen Tatoli/Francisco Sony.

DILI, 31 maiu 2022 (TATOLI)—Plan International Timor Leste (PITL), tersa ne’e, halo lansamentu ba aplikasaun saúde reprodutiva hodi bele hasa’e kualidade feto sira hodi asesu ba informasaun saúde reporodutiva no fornese servisu ba feto foinsa’e sira hotu atu responsabiliza-an ho di’ak liuhosi saúde umanu.

Diretora Plan Internasionál iha Timor-Leste (PITL), Dilyana Ximenes, hateten labarik feto bele foti desizaun ba sira-nia isin lolon rasik hodi foti desizaun ida atu lakohi kaben sedu no isin-rua sedu.

“Labarik feto bele foti desizaun, kona-ba sira-nia isin lolon, ne’ebé iha realidade katak ha’u-nia isin, ha’u-nia desizaun mak ha’u-nia futuru. Ho sentidu ida katak ha’u lakohi kaben sedu, isin-rua sedu, tanba ne’e fó espasu ba labarik ho seksu feto bele la’o tuir desizaun ne’ebé nia foti,” Diliana Ximenes hateten, iha Novu Turismu, tersa ne’e.

Plan Internasionál halo lansamentu ba saúde reprodutiva ba juventude hanesan feto ho mane sira, kuaze iha nasaun 85 inklui Timor-Leste.

Tuir nia, atinjementu ne’ebé Plan Internasionál hala’o mak ba labarik feto ho idade reprodutivu bele aprende saida mak saúde reprodutiva hodi sai feto ne’ebé forte, nune’e bele foti desizaun ba saida de’it mak hakarak no bele realiza nia mehi.

“Ita nu’udar feto presiza duni atu tuir edukasaun ba saúde reprodutiva, nune’e bele motiva no aumenta sira-nia koñesimenu hodi bele proteje an hosi violénsia oioin,” nia dehan.

Labarik feto hahú ho idade 10 to’o 25, bainhira sira aprende ho
saúde reprodutiva ne’e, mak bele lidera ba asuntu umanu ne’ebé ligadu ba realizasaun hosi direitu nu’udar feto foinsa’e sira.

Embaixadora Plan Internasionál iha Timor-Leste, Cidalia Lopes Nobre Mouzinho Guteres, hateten labarik feto foinsa’e sira tenke partisipa ba informasaun no servisu relasiona ho saúde reprodutiva, atu bele la’o tuir direitu no desizaun nu’udar feto.

“Programa ida-ne’e importante tebe-tebes, tanba atu bele hasa’e koñesimentu ba feto sira, atu kualifika karáter feto ba iha saúde reprodutiva tanba ne’e nu’udar dalan ida atu empodera no implementa liuhosi aplikasaun telemóvel oioin,” nia dehan.

Nia dehan, ohin sai loron ba menstruasaun nian ba feto maluk sira, nune’e nu’udar espasu importante ida ba programa Plan Internasionál nian ba kampaña impaktu negativu hosi kaben sedu, isin-rua sedu no mós violénsia hasoru feto no labarik feto sira liu-liu iha nasaun Timor-Leste.

“Ha’u-orgullu tebe-tebes ba programa Plan Internasionál nian iha Timor Leste, ne’ebé halo lansametu ba aplikasaun Saúde Reprodutiva, atu motiva no fó informasaun di’ak liután ba feto maluk sira hodi rekoñese nia saúde nomós ba kondisaun nu’udar feto reprodutivu,” nia hateten.

Entretantu reprezentante Ministériu Saúde, Silvano Pedro, hateten programa ne’e atu apoiu Ministériu Saúde ba saúde feto sira-nian, atu bele rekoñese di’ak ba direitu nu’udar feto ne’ebé mak iha direitu mós hanesan mane sira.

Programa ne’ebé mak Plan Internasionál halo sai meiu ne’ebé di’ak hodi ajuda ba feto sira, atu bele kuidadu sira-nia saúde ho di’ak tanba sira-nia saúde, no iha direitu atu foti desizaun mak sai sira-nia futuru ne’ebé di’ak.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here