Figura ka imajen “Nino Konis Santana” pinta ho tinta akrilik iha kuadru ida ho antesidénsia (background) ai-laran. Imajen Tatoli.Egas Cristóvão.

DILI, 31 maiu 2022 (TATOLI)—Iha sidade Dili nia barullu, ponteru relójiu hatudu tuku 9h30 dadeersan. Loron ne’e (tersa-feira) kalohan la hafalun lalehan. Lalehan azul ho roman loromatan leno rai-klaran. Loormatan ne’e kari nia roman tiru hamaus Palásiu Prezidensiál Nicolau Lobato, Bairru Píte (la’ós Ai-Tarak Laran), Dili, Timor-Leste.

Notísia Relevante: In memoriam Nino Konis Santana: Domin no esperansa ba Nasaun

Ai-funan sira ho kór mean, mutin, azul, matak, roxu no seluktan, buras iha jardin-laran simu loromatan nia roman bidu ho ksolok. Serbisu-na’in sira–protokolu, seguransa, jornalista sira no seluktan, sira ida-idak hala’o sira-nia atividade rasik ho kbiit rasik.

Loron ne’e, loron espesiál ida ba TLPU (Timor-Leste press Union)–organizasaun jornalista sein-fin-lukrutivu, iha ajénda ‘espesiál’ ida ho Prezidente Repúblika, José Ramos Horta. Katak, iha soru-mutu ida markadu ba tuku 10h00 Otl (Oras Timor-Leste).

Nune’e, minutu 15 antes, estrutura TLPU kompostu husi Candido Alves (Prezidente), Florêncio Miranda Ximenes, Jeremias Madeira, Quembelina Amaral, Rafael Belo, Marcelino Bata, no Efizenia, hein ona iha sala-hein nian.

Bainhira oras to’o, protokolu konvida no enkontru mós hahú la’o daudaun-iha introdusaun, troka ideia no partilla informasaun kona-ba asuntu jornalista nian, natureza organizasaun–identidade, valór, prinsípiu no norma sira, entre ‘jornalista’ sira-ne’ebé hamahan aan iha TLPU, iha salaun-boot hasoru-malu nian, ho Xefe Estadu, José Ramos Horta hamutuk ho nia ekipa gabinete sira.

Iha salaun-boot hasoru-malu nian, entre figura sira-ne’ebé mak iha, hetan figura “Nino Konis Santana” pinta ho tinta akrilik iha kuadru ida ho antesidénsia (background) ai-laran, tara iha didin-lolon parte lorosa’e nian. Kmanek iha matan no hafurak neon.

Iha figura ne’e, Nino Konis Santana tuur ho oin-nabilan, ho espresaun nu’udar éroi ida. Hatais farda-militar, tuur ho kilat–ain tiding ba rai no tutun sa’e ba lalehan, iha ai-laran, natureza Timor-Leste nian. Lalatak “éroi asswa’in ne’e nu’udar rezultadu liman-badaen timor-oan ida, nu’udar ‘memória’ be homan hamutuk iha tempu no fatin, tara nonook iha Salaun Nino Konis Santana, iha Ai-tarak laran, Palásiu Prezidensiál, jornalista Tatoli haree rasik ho matan, ohin.

La sala, iha fatin-ketak, iha loron 27 maiu liubá, Jornalista Tatoli ‘hetan’ mós Nino Konis Santana nia lalatak ida ‘grava’ metin iha poster monok ida ho hakerek liafuan “Halumarau ciceken naten halu fa’i–Funu-na’in hamriik metin halo funu”.

Ninia lalatak, hamriik ladook mós figura rezisténsia ida, hateke ba karuk, ho ropa-makerek nu’udar militár. Boña mean iha ulun ho oin nabilan nakonu ho esperansa. Figura ne’e mak Komandante em xefe das FALINTIL, Kay Rala Xanana Gusmão–líder karismátiku Timor-Leste, nian. 

Iha mós lalatak seluk ho kór metan-mutin, timor-oan ida hamriik kaer hela altu-falante hamutuk ho foinsa’e timor-oan sira seluk, feto no mane, ko’alia hela. Timor-oan ne’e mak Saudozu Vicente Reis “Bie Ki Sahe”. 

La dook husi “Sahe”, iha mós saudozu seluk, Nicolau dos Reis Lobato. Nia lalatak metan-mutin grava-metin iha kuadru ida. Saudozu Nicolau Lobato hatudu hamnasa-midar ‘pinta’ ho tinta dijitál rai-metin iha moldura (binkai) 10R ida-nia laran. 

Entre figura tolu ne’e, iha mós figura asswa’in ida – Taur Matan Ruak (TMR). Falintil, funu-na’in (atuál xefe Governu). Nia hatais uniforme militár, lensu kór mean ho metan kesi-metin iha kakorok, liman tau ba kotuk hamriik nakonu ho karisma nu’udar funu-na’in korajozu ida. 

Besik figura TMR, iha tan éroi asswa’in desparesidu ida – David Alex ‘Daitula’. Ho boña kór roxu ida no hatais roupa militár, hatudu espresaun ne’ebé nakonu ho sentidu. Asswa’inn ne’e, nia lalatak ‘homan’ iha fotografia ida, tau iha moldura tara besik TMR nia lalatak. 

Lalatak éroi asu’ain sira ne’e, tara iha didin-lolon Sede dos Veteranos, Taibesi-Dili, Timor-Leste, nu’udar memória ida ba jerasaun foun sira, ‘hamaluk’ lorokraik tuku lima (sesta-feira, 27 maiu), besik merkadu Taibesi–momentu oportunu ida, ba labarik sira halimar kontente, goza liberdade iha sira-nia ‘mundu’–mundu labarik nian hein otas nakaras. 

Biografia

Nino Konis Santana ho naran-sarani ka batizadu Antoninho Santana. Moris iha rai-ulun Timor-Leste – fatin haree loromatan sa’e, iha Veru, Suku Tutuala, Postu Administrativu Tutuala, Munisípiu Lautém, iha loron 12 janeiru 1957, husi fuan ‘domin’ Poco Tana (inan) no Jee Makaru (Aman).

Tuir fonte oioin, Nino Konis Santana, nu’udar komandante FALINTIL (Forças Armadas de Libertação Nacional de Timor-Leste), grupu rezisténsia Timor-Leste durante okupasaun Indonézia, abril 1993 to’o lakon vida.

Iha ain-le’ut estudu nian, Nino Konis Santana hala’o nia estudu iha eskola Katólika no hala’o knaar nu’udar mestre iha nia rai moris fatin Tutuala to’o Operasaun Seroja iha fulan dezembru 1975.

Durante moris, Nino Konis Santana, asume responsabilidade oioin, hodi kontribui no halo abnegasaun totál hodi luta ba kauza Timor-Leste nian, iha prosesu luta naruk ba ukun rasik aan to’o lakon vida iha loron 11 marsu 1998 – tinan ida tan molok hakat ba determinasaun Timor-Leste nia luta liuhusi opsaun “referendus” no “autonomia espesiál” iha tinan 1999.

Saudozu Nino Konis Santana, nia istória balun ‘homan’ ona iha livru husi José Mattoso: A Dignidade – Konis Santana e a Resistência Timorense, Jill Jollife: Finding Santana, etc. Nune’e mós, atu hanoin hikas saudozu ‘éroi asswa’in ne’e nia luta no atu nia memória labele lakon husi jerasaun ba jerasaun, mak timoroan sira ‘prega-metin’ saudozu nia naran liuhusi naran eskola, edifísiu, salaun no parke nasionál – Eskola Sekundária jerál Nino Konis Santana (Gleno, Ermera), Salaun-enkontru, Nino Konis Santana, iha Pálasiu Prezidensiál Ai-tarak laran, Dili.

Saudozu Nino Konis Santana nia naran mós prega Parke Nasionál ida-ne’ebé hanaran Parke Nasionál Nino Konis Santana, nu’udar jardin nasionál primeiru Timor-Leste nian, ne’ebé lokaliza iha Tutuala, munisípiu Lautém husi Governu no Estadu iha tinan 2007.

Saudózu Nino Konis Santana nia isin-lolon lakon iha ema hotu nia matan maibé ninia naran no figura sira sei rai metin iha ema wa’in nia fuan no laran, hanesan lema ne’ebé hakerek dalen FATALUKU; “Halumarau ciceken naten halu fa’i–Funu-na’in hamriik metin halo funu”. Se Nino Konis Santana hamriik metin halo funu atu liberta povu no rai Timor-Leste, ukun na’un sira tenke hamriik metin halo funu dala ida tan hodi liberta povu hosi mukit.

In memoriam Nino Konis Santana!

Notísia Relevante: Memória Konis Santana: ”Halu marau, ciceken naten halufai”

Jornalista : Rafy Belo

Editór         : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here