Jogadór River Bulobu uza farda mutin, hadau hela bola no klubu adversáriu Jalagovi hatais farda metan kahur mean. Imajen Tatoli/Sérgio da Cruz.

BOBONARO, 31 maiu 2022 (TATOLI) – Kompetisaun jogu futeból sub-23 époka 2022 ne’ebé realiza iha kampu futeból Maliana, tersa ne’e klubu River Bulobu susesu hakat ba faze kuarta-finál hafoin manán klubu adversáriu Jalagovi liuhosi suta penalidade.

Iha menutu dahuluk hahú ekipa rua lansa kedas kontra atake ba malu, klubu rua mai ho joga modelu tensaun-aas tanba hakarak hadau-malu vitória nune’e bele ultrapasa ba faze kuarta-finál.

Notisia relevante:Jogu sub-23 iha Maliana, Jalagovi manán mihis Monumentu FC

Jogu kontinua la’o menutu lima ba leten, Jalagovi domina bola barak-liu hodi lansa presaun iha liña oin atu ho intensaun atu prodús golu ruma, maibé tama ladi’ak tanba defeza River Bulobu metin, hakat ladi’ak.

klubu Jalagovi hatais farda metan kahur mean lansa hela kontra atake hasoru adversáriu River Bulobu hatais farda Mutin kahur matak. Imajen Tatoli/Sérgio da Cruz.

Nune’e ekipa rua hasa’e tán ritmu jogu, maibé ekipa mai hosi dook ne’e nafatinn domina bola jogu ho meiu kampu, maibé River Bulobu kontrola bola hodi esforsu hadau bola hosi sira-nia adversáriu.  Ikus mai defeza Jalagovi hamonu avansadu Denilton (9) fora hosi grande área no árbitru deside fó oportunidade sutu livre.

Oportunidade brillante ne’e jogadór Nélio (4) konsege ezekuta ho susesu hodi muda rezultadu ba 1-0. Ho golu ne’e halo ambiente kampu-laran manas liután, ekipa rua nefatin iha ambisaun atu prodús golu, sutu barak avansadu Jalagovi  Eusebio (17) lansa maibé la kona alvu.

Ho ameasa ne’e halo ekipa ne’e forte liután duir bola barak ba oin, ikus mai oportunidade monu duni ba sira, tanba Eusebio (17) konsege responde golu ida hodi hatuur rezultadu ba 1-1 to’o termina jogu primeira parte.

Hafoin deskansa, tama segunda parte ekipa rua halo serbisu maka’as hodi fó presaun ba malu atu gaña vitória, maibé esforsu hirak-ne’e nafatin folin laek tanba to’o termina segunda parte la akontese golu ruma.

Haree ba menutu 90 aumenta tán oras extarordináriu menutu 20, maibé ekipa rua hatudu forsa hanesan, rai mós komesa nakaras hahú falun kampu futeból Maliana, entaun tenke hakat ba suta penalidade.

Iha oportunidade ne’e, árbitru sira fó kada klubu ema na’in-lima mak ezekuta, nune’e iha faze nee Jalagovi  na’in-tolu susesu rekolla pontu no jogador na’in-rua Cesario (7) no Eusebio (17) mak falla ezekuta oportunidade osan-mean ne’e, enkuantu jogadór na’in-haat hosi River Bulobu susesu, falta Melandovio (5) mak falla.

Rezultadu jogu ne’e hatudu River Bulobu rekolla pontu neen no Jalagovi pontu haat, nune’e vitória ba River Bulobu hakat ba faze kuarta-finál no Jalagovi tenke simu konsekuénsia lakon no fila ba uma suku Karabau, postu administrativu Bobonaro.

Klubu ne’ebé sei kompete iha jogu iha faze kuarta-finál mak hanesan, Soboa-ai hosi suku Oe-leu, postu administrativu Bobonaro, Ex Kodim hosi suku Ritabou, postu administrative Maliana, Madiran FC no River Bulobu.

Notisia Relevante:Jogu sub-23 iha Maliana, Sobo-ai hakat ba kuarta-finál

Jogu ne’e lidera hosi árbitru Lucas Feliz, asistente primeiru Peregrinho dos Reis, asistente segundu Julito ‘Alito’, ábitru suplente Longuinhos ‘Gepen’.  Árbritu hirak-ne’e hetan ona sertifikadu lisesan (D) no (C) hosi Federasaun Futeból Timor-Leste (FFTL) iha tinan hirak liubá.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here