Lansamentu fatuk dahuluk konstrusaun postu saúde iha suku Uaimori, Viqueque, segunda (30/05). Imajen Tatoli/Vitorino Lopes da Costa

VIQUEQUE, 31 maiu 2022 (TATOLI)–Diretór Servisu Saúde munisipál Viqueque, Francisco de Carvalho, informa, komunidade Japaun apoiu ona fundu hodi harii postu saúde iha suku Uaimori, postu administrativu Viqueque vila, munisípiu Viqueque, hodi fasilita komunidade lokál.

“Horiseik (segunda), ita hahú lansa fatuk dahuluk konstrusaun postu saúde, ho durasaun serbisu fulan-tolu,” Diretór servisu munisipál hateten ba Agência Tatoli, iha ninia knaar fatin, Viqueque, tersa ne’e.

Dezeñu postu saúde Uaimori sei tuir padraun hosi Ministériu Saúde (MS), ho totál kustu konstrusaun ne’ebé apoiu hosi Japaun hamutuk $90.000, toma-konta serbisu hosi parseiru, la liuhosi kompañia ruma.

“Postu saúde Uaimori bainhira ramata sei benifisia ita-nia komunidade. Tanba fasilidade saúde fó atendimentu ba ema hotu ne’ebé hakakrak hetan tratamentu iha fasilidade saúde,” nia akresenta.

Notísia relevante: MS-KFP asina karta aseitasaun ho profisionál saúde 24

Antes ne’e, Programa Nasionál Dezenvolvimentu Suku (PNDS) konstrui ona uma ba  pesoál saúde sira iha suku Uaimori hodi bele uza.

Nia dehan, dezafiu ne’ebé daudaun enfrenta maka maski daudaun ne’e halo konstrusaun postu saúde, maibé dalan liga ba suku Uaimori ho kondisaun grave liu no bainhira iha tempu udan difikulta transporte liu, hanesan ambulánsia atu evankua moras ruma.

“Ita hatene dalan liga ba suku Uaimori ho kondisaun a’at liu, satán iha tempu udan karreta asesu mós ladi’ak, hanesan ema moras ruma atu evakua ne’e susar tebes. Bainhira estrada ladi’ak ita labele transfere pasiente no fornese lojístika mós sai tarde tanba kondisaun jeográfika no klima. Sai difikuldade asisténsia médika ba ita-nia komunidade,” nia relata.

Tanba ne’e, Diretór ne’e husu ba Ministériu Obra Públika (MOP) atu tau-matan ba kondisaun estrada liga ba suku sira ne’ebé ho kondisaun estrada a’at.

Bazeia ba dadus sensu populasaun tinan 2015, populasaun suku Uaimori iha aldeia neen hanesan Uma Liurai, Uma Bo’o, Uaibubu, Lu-Lei, Uatu-Lesu no Mea-Uain, ho totál 1.142, kompostu hosi feto 564 no mane 578, hosi totál uma-kain 242.

Dadaun ne’e, profisionál saúde ne’ebé destaka ona iha suku Uaimori kompostu hosi médiku ida, enfermeiru ida, parteira ida inklui voluntáriu sira hosi saúde públika.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here