Ilustrasaun. Imajen/Espesiál.

DILI, 31 maiu 2022 (TATOLI)—Advokásia Jerente ba Programa Fundasaun Alola, Maria Evelina Iman, hateten eskola 15 mak sai alvu ba implementasaun programa spotlight “Halo Ligasaun ho Respeitu” ba inan-aman ho manorin ensinu báziku terseiru siklu iha munisípiu Bobonaro, Ermera no Viqueque.

Notísia Relevante: Inisiativa Spotlight atu halakon violénsia hasoru feto no labarik feto

Nia hateten, eskola 15 ne’e mak iha munisípiu Bobonaro hanesan Eskola Bázika Katólika (EBC) Atabae, EBC Palaka, EBC Tapo, EBC Railun. Iha munisípiu Viqueque mak EBC Kabira Oan, EBC Naedala, EBC Lacluta, EBC Mundo Perdidu no EBC Uatu Karbau. Munisípiu Ermera hanesan EBC Lisapat, EBC Railaka, EBC Katrai Leten, EBC Lasaun no EBC Railaku Leten.

“Ita-nia tarjetu ba ita-nia spotlight mak inan-aman ho manorin sira. Nune’e iha munisípiu Bobonaro ema hamutuk 30 (feto 15 no mane 15) ho manorin 10 kada munisípiu ida. Ida-ne’e hanesan mós munisípiu Ermera ho Viqueque nian,” Evelina haktuir ba jornalista sira, bainhira aprezenta rezultadu implementasaun programa spotlight ho tema “Halo Ligasaun ho Respeitu”, iha salaun City 8, Maleuana, Dili, tersa ne’e.

Hosi rezultadu Halo Ligasaun ho Respeitu ba inan-aman no manorin bazea ba situasaun atuál iha ambiente eskola no halo dezenvolvimentu matadalan mak ba Mane ho Vizaun Foun ho Fundasaun Alola halo entervista direta ba reprezentante inan-aman, entervista ba família.

“Formasaun ne’ebé ami fó ba ita-nia inan-aman ho manorin sira hanesan matéria edukasaun sívika no Konsellu Estudante. Liuhosi programa ne’e atu oinsá bele redús violénsia hasoru feto no labarik feto sira iha Timor-Leste,” nia esplika.

Responsável ne’e hatutan, hosi partisipante ba formasaun ne’e pursentu mane mak aas liu (53%) ne’ebé kompostu hosi Bobonaro mane 23% no feto 10%, Viqueque iha mane 20% no feto 13%, munisípiu Ermera iha mane 10% no feto 23%.

“Ita-nia partisipante ba formasaun menus tanba ho razaun katak inan moras ka halo atividade seluk entaun labele tuir formasaun no deside laen ka oan boot mak reprezenta hodi tuir formasaun refere,” nia dehan.

Formasaun ligasaun ho respeitu hatudu katak manorin sira-nia koñesimentu molok no depois iha mudansa ne’ebé di’ak tebes, tanba antes ne’e menus liu maibé bainhira tuir tiha formasaun ne’e bele aumenta sira-nia koñesimentu no kapasidade manorin no inan-aman sira.

Aleinde fó formasaun, ekipa spotlight ne’ebé kompostu Organizasaun Mane ho Vizaun Foun ho Fundasaun Alola ba programa spotlight ho tema ne’ebé durante implementa iha munisípiu tolu no hetan istória susesu hosi munisípiu Viqueque mak Prisca Amaral.

Prisca Amaral hateten, situasaun ne’ebé hasoru iha pasadu uluk nia sempre hanorin ninia oan ho violénsia hanesan baku, hakilar no ameasa, halo nuneé sira tauk, hanesan lisaun ladi’ak ida.

Lisaun aprende durante loron lima ne’e mak kona-ba oinsá atu muda hahalok negativu sira no mós kona-ba tipu violénsia sira hanesan persiza respeita ideia hosi oan sira, ko’alia ho lian mamar ka pozitivu, labele ko’alia ho lian makaas ka tolok no akompaña sira iha tempu estuda.

Maibé liuhosi matéria hirak-ne’e, nia dehan, matéria ne’e di’ak duni ba ninia família no mós komunidade no sosiedade, ne’ebé nia parte sei prátika iha família no habelar ba viziñu sira hodi prevene violénsia oioin iha postu Lacluta.

“Ida-ne’e mak sai istoria susesu ba ami-nia implementasaun programa spotlight iha Munisípiu Viqueque,” nia dehan.

Iha objetivu jerál ba spotlight mak atu hakbiit manorin no komunidade eskola sira atu efetivamente prevene, responde ba diskriminasaun jéneru no violénsia kontra feto no labarik feto sira, nu’udar forma komun violénsia bazea ba jéneru liuhosi aprende no hasa’e koñesimentu kona-ba kauza no impaktu hosi violénsia mak promove hahalok pozitivu sira no dezenvolve abilidade sosiál no emosionál.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here