Embaixadór Austrália iha Timor-Leste, Bill Costello. Imajen TATOLI/Francisco Sony.

DILI, 31 maiu 2022 (TATOLI)—Embaixadór Austrália iha Timor-Leste, Bill Costello, tersa ne’e hala’o enkontru ho Prezidente Repúblika, José Ramos Horta, hodi atualiza área kooperasaun entre Estadu rua no hato’o prosesu formasaun Governu foun iha Austrália.

Diplomata Australiano ne’e kontente hasoru malu ho Prezidente Repúblika ba dahuluk hafoin simu responsabilidade foun nu’udar Xefe Estadu.

“Objetivu hosi enkontru ne’e atu atualiza área balun hanesan kooperasaun entre Austrália no Timor Leste. Espesifikamente fó hatene Prezidente Repúblika kona-ba progesu formasaun Governu foun iha Austrália. Ami foin lalais hala’o eleisaun semana kotuk no hili ona Primeiru-Ministru no mós ohin loron iha Austrália hili ona Ministru sira seluk,” nia hateten ba jornalista sira hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite.

Nia ko’alia kona-ba kontaktu entre Governu hosi nasaun rua ne’e no mós posibilidade konvida Prezidente Repúblika, José Ramos Horta, atu vizita Austrália.

“Ami mós ko’alia no konfirma posibilidade kona-ba vizita Prezidente Repúblika ba Austrália ne’ebé sei akontese iha tempu hirak tuir mai,” nia hateten.

Embaixadór Austrália iha Timor-Leste ne’e atualiza ba Xefe Estadu atividade lubuk hanesan iha área telekomunikasaun, ne’ebé ohin nia-parte mós sai sasin ba asina akordu ba fibra optika hosi Governu Timor-Leste no kompañia Alcatel Submarine Network (ASN).

Aleinde ne’e, Embaixadór ne’e ho PR diskute prosesu negosiasaun akontese iha kampu greater sunrise.

“Ami mós ko’alia uitoan kona-ba negosiasaun ne’ebé akontese iha kampu greater surise ne’ebé haree kona-ba espesial rejime ne’ebé liga ba asina akordu fronteira Maritima iha tinan 2018,” nia hateten.

Austrália iha kompromisu mútua atu koopera iha broadcasting entre Timor-Leste no Austrália,
tanba Governu foun Austrália iha kompromisu atu servisu ho Governu Timor Leste iha mobilidade traballadór ne’ebé Austrália sei fó oportunidade barak tan ba timor-oan sira hodi bá servisu iha Austrália ho durasaun tempu ne’ebé naruk.

Nune’e mós, nia dehan, Austrália sei fornese viza rezidénsia permanente ba timor-oan sira-ne’ebé ba Austrália.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here