Diretór Servisu Terra no Propriedade Munisípiu Bobonaro, Castro Lacu Martins. Imajen Tatoli/Sérgio da Cruz.

BOBONARO, 31 maiu 2022 (TATOLI) – Diresaun Servisu Terra no Propriedade (DSTP) Munisípiu Bobonaro, enfrenta hela problema laiha transporte operasionál hodi halo atendimentu ba kazu disputa rai ne’ebé akontese iha komunidade nia leet.

Diretór DSTP Munisípiu Bobonaro, Castro Lacu Martins, haktuir durante ne’e halo atendimentu ba kazu disputa rai utiliza de’it karreta ida no motorizada ida mak fasilita movimentasaun hodi responde reklamasaun hosi komudade sira kobre munisípiu Bobonaro to’o área remota sira.

Maibé daudaun ne’e viatura estadu hirak-ne’e labele fasilita ona funisionáriu sira halo servisu iha terrenu, tanba kondisaun karreta ida-ne’e avaria hela no besik tama prosesu leilaun tanba uza ho durasaun kleur ona.

Enkuantu motorizada ne’e Polísia Nasionál Timor-Leste, seksaun tránzitu munisípiu Liquiçá halo apreensaun hela tanba funsionariu ida utiliza halo serbisu, soke ema iha área Maubura nian to’o agora seidauk foti tanba seidauk kompleta prosesu administrativa.

“Ami-nia difikuldade mak transporte ne’ebé atu fasilta ami halo serbisu mak laiha, liuliu atu fasilita ami ba terrenu halo mediasaun ba kazu disputa rai sira, iha kapitál Maliana inklui ita-nia área sira-ne’ebé remota ne’e,” nia informa ba jornalista sira, iha kna’ar-fatin, tersa ne’e.

Castro fundamenta, problema ne’e akontese kleur ona, dezde mandatu diretór sira sesante sempre hasoru, aprezenta beibeik kestaun ne’e liuhosi enkontru iha nível nasionál, maibé to’o agora ministériu kompetente seidauk tau prioridade.

Maske viatura estadu hirak-ne’e la funsiona, maibé hanesan servidór estadu la hamate espíritu no vontade atu buka kanál seluk bele apoia, nune’e obrigadu tenke koordena ho autoridade munisípiu Bobonaro apoia transporte hodi fasilita ekipa bele tún ba terrenu.

“Sira apoiu transporte ne’e mós ami sei halo fali pedidu ruma, sé kuandu haree katak urjente duni, atu atende entaun sira fasilita ami tún ba terrenu, maibé dalaruma ita halo despaxu beibeik mós ladún di’ak, tanba sira mós iha serbisu barak, ne’e duni sé bele karik ministériu tenke haree asuntu ne’e atu serbisu bele la’o ho di’ak,” nia sujere.

Hahú hosi fulan-janeiru mai to’o agora DSTP Bobonaro simu reklamasaun kazu disputa rai hamutuk hitu. Hosi númeru kazu haat mak konsege halo mediasaun no iha ona solusaun no tolu seluk mak seidauk halo mediasaun. Reklamasaun hirak-ne’e rua mai hosi postu administratrivu Cailaco, restante iha kapitál Maliana espesialmente suku Ritabou.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here