Embaixador da União Europeia, Andrew Jacobs. Imajen Tatoli/Francisco Sony

DILI, 31 maiu 2022 (TATOLI)—Embaixadór Uniaun Europeia (UE) iha Timor-Leste, Andrew Jacob, hateten atu atinje igualdade jéneru iha Timor-Leste presiza promove inkluzaun.

“Ita atu atinje igualdade jéneru presiza promove inkluzaun iha Timor-Leste,” Embaixadór Uniaun Europeia ne’e hateten liuhosi nia diskursu bainhira partisipa programa inisiativa Spotlight hodi aprezenta rezultadu implementasaun programa halo ligasaun ho respeitu no parantalidade pozitivu iha Munisipiu Bobonaro, Ermera, no Viqueque, ne’ebé hala’o hosi Fundasaun Alola, iha Salaun City8 Has Laran, Maaleuana, Dili, tersa ne’e.

Embaixadór ne’e hateten, ema hotu-hotu hamutuk ho Governu atu adopta métodu ba igualdade jéneru no mós atinje objetivu lahó diskriminasaun atu hetan objetivu ba inkluzaun no moris di’ak no la husik ema ida iha kotuk.

Diplomata ne’e hatutan, ohin loron estudante 450 no inan aman 455 no manorin na’in-20 iha Viqueque, Bobonaro no Ermera komprende no hatene oinsá respeita malu iha uma no komunidade.

“Atu hatane ba objetivu ba violénsia bazeia ba jéneru iha Timor Leste ita tenke promove inkluzaun seguransa protesaun no moris di’ak ba efetivu,” nia dehan.

Tanba ne’e ho objetivu Spotlight ne’ebé mak fornese finanseira hosi Uniaun Europeia ne’e ema hotu hamutuk liu-liu eskola, komunidade, xefe suku, igreja ema ho defisiénsia, Governu no parte hotu.

“Violénsia bazea ba jéneru afeita ba sosiedade tomak, tanba ne’e sosiedade tomak tenke responde ba violénsia ne’e labele hapara ida bainhira servisu seidauk hotu,” nia dehan.

Iha jornada ida-ne’e fó orientasaun ba sosiedade sivil sira sai kolaboradór prinsipál ba mudansa transformativu ho neineik maibé beibeik nafatin ho líder organizasaun sira ho movimentu progresivu no besik liu ba ema sira-ne’ebe hetan violénsia.

Sekretária Estadu Igualdade no Inkluzaun (SEII), Maria do Rosário Fátima Correia, hatutan tinan oin mai iha mós eleisaun parlamentar feto tenke partisipa tanba líder feto iha suku sira sei menus, tanba ne’e presiza fó kapasitasaun nune’e hasa’e feto nia partisipasaun.

“Nafatin fó formasaun oioin oinsá atu apoiu feto sira, nune’e númeru líder feto iha suku bele aumenta liu-liu feto mos bele sai xefe aldeia, nune’e reforsa feto sira atu foti desizaun iha área oioin,” nia dehan.

Nune’e mós Feto Potensiál, Celestina de Almeida, hatutan nafatin fó formasaun ba feto oinsá mak hasa’e koñesimentu hodi partisipa másimu iha vida polítika no seluk tan.

“Feto nafatin aprende no esforsu an oinsá mak hasa’e koñesimentu no feto tenke brani foti desizaun ba an rasik, nune’e sai ativu iha prosesu dezenvolvimentu nasionál,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here