Responsável Monitorizasaun no Evaluasaun hosi WFP, Sofia Shin, ofisialmente entrega ekipamentu IT ba Xefe Gabinete Prezidente Autoridade Munisípiu Bobonaro, Ilídio dos Santos. Imajen Tatoli/Sérgio da Cruz.

BOBONARO, 30 maiu 2022 (TATOLI) – Parseiru dezenvolvimentu Programa Alimentár  Mundiál (WFP, sigla inglés), segunda ne’e apoia ekipamentu Informátika Teknolojia (IT) ba administrasaun munisípiu no diresaun servisu edukasaun munisípiu Bobonaro.

Responsável Monitorizasaun no Evaluasaun hosi WFP, Sofia Shin, esplika apoia hirak-ne’e hanesan komitmentu WFP nian atu kontinua apoia Timor-Leste, atu mellora serbisu administrasaun munisípiu inklui serbisu edukasaun oinsá fasilita sira atu rekolla dadus kona-bá implementasaun programa merenda eskolár.

“Ami entrega ekipamentu IT nian hanesan, desktop rua ba autoridade munisípiu Bobonaro no dekstop rua ho laptop ida ba diretór edukasaun munisípiu Bobonaro atubele fasilita sira halo serbisu estadu nian,” nia informa ba jornalista sira iha administrasaun munisípiu Bobonaro, hafoin distribui fasilidade ne’e.

Hafoin entrega apoia hirak-ne’e WFP mós aprezenta projeu kona-bá baze line ba autoridade muinisípiu Bobonaro kona-bá sei halo avaliasaun programa merenda eskola durante loron 15 iha Ensinu Bázika Sentrál (EBC, sigla portugés) no Eskola Bázika Filiál (EBF) hamutuk 143 munisípiu ne’e inklui kondisaun dapur no armazein sira.

“Depois rezultadu hosi avaliasaun ne’e mak ami sei konstrui no reabilita dapur no dsitribui foos ho vitamina ba eskola sira depois ami mós sei fasilita formasaun,” nia akresenta.

Xefe Gabinete Prezidente Autoridade Munisípiu Bobonaro, Ilídio dos Santos, agradese ba parseiru WFP tanba apoia hirak-ne’e bele hakmaan serbisu administrasaun iha futuru.

“Ami simu fasilidade hirak-ne’e uza ba nesesidade serbisu nian, no sei husu responsablidade mós ba diretór serbisu sira atu uza ho kuidadu atu nune’e parseiru WFP bele iha konfiansa nafatin,” nia enkoraja.

Nune’e mós Diretór Servisu Edukasaun Munisípiu Bobonaro, Crispim Moniz, sente kontente tanba bele responde ona sira-nia pedidu ne’ebé aprezenta iha fulan hirak liubá.

“Ami mós hato’o obrigadu barak tanba ba oin ami sei hetan tán apoiu hadi’ak dapur merenda eskolár no apoiu foos. Ida-ne’e ami sente ajuda tebes ami no bele rezolve ona ptoblema sira-ne’ebé durante ne’e ami-nia eskola enfrenta,” nia hateten.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here