Sekretária Estadu ba Igualdade no Inkluzaun (SEII), Maria do Rosário Fátima Correia. Imajen Tatoli/Francisco Sony.

DILI, 30 maiu 2022 (TATOLI)—Sekretária Estadu Igualdade no Inkluzaun (SEII), Maria do Rosária Fátima Correia, hateten SEII sei motiva feto portadora defisiénsia sira atu kompete iha eleisaun xefe suku tinan 2023 ne’ebé atu mai.

“SEII motiva feto no portadora defisiénsia sira atu kompete ba xefe suku ho eleisaun munisipál nian ne’ebé sei mai iha tinan oin,” nia hateten ba jornalista sira hafoin halo enkontru ho grupu traballu jéneru, iha Delta Nova, Dili, segunda ne’e.

SEII sei esforsu atu oinsá kosidera feto mós bele kompete iha elesaun sira tuir mai liu-liu xefe suku no eleisaun munisipál sira.        

Xefe Departamentu Promosaun Partisipaun iha Políitka SEII, José de Carvalho, hateten vizaun no misaun SEII katak Timor-Leste sei sai hanesan nasaun ida-ne’ebé prósperu nakonu ho dame no sosiedade ida-ne’ebé iha igualdade jéneru no inkluzivu ne’ebé ema-nia dignidade no direitu umanu inklui direitu feto no labarik feto ne’ebé hetan ona valór, protesaun no promove iha lei no kultura sira.

Misaun SEII mak atu halo instituisaun sai sensivél ho asuntu jéneru liuhosi estratéjia Abordajén Integrada Jéneru (AIJ) iha polítika, lei, programa no orsamentu no halo advokásia ba komunidade atu iha sensibilidade ba jéneru iha nivél nasionál, munisipál no lokál liuhosi hakbiit no promove partisipasaun feto iha dezenvolvimentu iha área polítika no nivél foti desizaun.

“Misaun ida mak hapara violénsia kontra feto, labarik feto no grupu risku sira. Maibé presiza hakbiit no promove partisipasaun feto iha dezenvolvimentu ekonómiku iha Timor-Leste no mós hasa’e partisipasaun feto iha área polítika no nivél foti desizaun iha nasionál, munisipál no suku,” nia dehan.

Persentajen feto ne’ebé oras ne’e asume kargu polítika iha nasaun ne’e kiik liu tanba feto asume pasta Xefe Suku hamutuk ema na’in-21, Xefe Aldeia ema na’in-85, reprezentante joven feto iha suku 459, autoridade lokál feto na’in-ida, feto sai deputada iha Parlamentu Nasionál foin 40%, feto tuur iha estrutura Governu 16%.

Jornalista : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here