Atleta timor-oan nai’in haat ne’ebé hetan medulla iha eventu SEA Games iha Vietname. Imajen/Espesiál.

DILI, 30 maiu 2022 (TATOLI)–Prezidente Repúblika (PR), José Ramos Horta, kondekora hodi atribui medalla méritu ba atleta hetan medalla no treiniadór sira-ne’ebé foin lalais partisipa iha eventu Sea Games ba dala XXXI iha Vietname.

“Atividade desportu parte ida kontribui ba hametin dame no ita la’ós de’it atleta maibé sai embaixador nasaun nian,” ’PR Horta hato’o iha nia diskursu iha serimónia kondekorasaun refere iha Palásiu Prezidensiál Nicolau Lobato, Bairru Pite, segunda ne’e.

Medalla méritu PR nian ne’e kria hosi dekretu lei númeru 15/2009, 18 marsu, hodi rekuñese sidadaun sivíl ema rai-laran no estranjeiru, militár no polísia ne’ebé servi nasaun ho siginifikadu pás no dame.

Nune’e, Xefe Estadu atribui medalla ba atlera ho modalidade boxe ba Delio Anzaqeci Mouzinho no José da Silva.

Ba modalidade atletismu mak Felisberto de Deus no atleta ho modalidade Taekwondo, Santina A. De S. Fernandes.

PR mós kondekora treinadór nain-tolu hanesan Odete Belo hosi modalidade atletizmu, Ki Tae Kim hosi modalidade Taekwondo no Gil dos Santos hosi modalidade boxe.

Atleta hirak ne’e oferese ona medalla osan mutin tolu no medalla osan metan rua ba Timor-Leste iha eventu SEA Games.

Vise Prezidente Komisaun Olímpiku Nasionál Timor-Leste (CEONTL), Mateus da Cruz, hateten sente orgullu tanba Xefe Estadu bele atribui ona kondekorasaun ba atleta no treinadór sira

Nia dehan, mezmu atleta sira hasoru difikuldade oioin maibé hatudu duni prestasaun iha eventu refere hodi hamorin Timor-Leste nia naran iha eventu Sudeste Asiátiku ne’e.

“Ita hatene katak Timor-Leste nia fasilidade no ekipamentu seidauk di’ak ho kondisaun ki’ik ita-nia atleta sira utiliza kondisaun ne’ebé ladun kompletu maibé sira konsege hamorin Timor-Leste nia naran iha jogu Sudeste Asiátiku foin lalais, iha SEA Games,” nia apresia.

Nune’e, hein katak Governu iha ona planu ba área desportu nian oinsá tau matan no dezenvolve desportu rai-laran lao di’ak liután hodi kompete mós kompetisaun nivél internasionál sira, no PR atuál oinsá ko’alia tau atensaun mós hodi mellora kondisaun atleta sira-nia an.

“Komite Olimpiku hanesan órgaun másimu ne’ebé responsavel ba jogu internasionál no ita ko’alia prestasaun federasaun tanba ne’e ita haree importante liu tau atensaun ba federasaun tanba to’o agora federasaun balun laiha fatin atu treinamentu adekuadu ba sira liliu selesaun nasionál,| nia dehan.

Atleta feto Taekwondo, Santina Fernandes, hato’o agradese ba família, treinadór no maluk timor-oan hotu ne’ebé durante ne’e fó apoiu tomak hodi bele partisipa ona iha eventu internasionál ne’e.

“Mai ha’u pesoál, hanesan orgulu no motivasaun ida nu’udar atleta ida, nune’e sei esforsu an di’ak liután atu hasae ita-nia Bandeira iha nasaun seluk,” nia kompromete.

Jornalista : Nelson de Sousa

Editór       : Cancio Ximenes

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here