DILI, 30 maiu 2022 (TATOLI)— Ministru Justisa (MJ), Tiago Amaral Sarmento, informa Diresaun Aprovizionamentu Ministériu Justisa, iha fulan kotuk, hahú loke konkursu públiku, nune’e tempu badak empreza vensedór bele halo manutensaun ba mákina imprime Fargo, atu prodús Billete Identidade (BI), hosi munisípiu Bobonao, Baucau, Covalima, Ermera, Manatuto no Viqueque.
“Ha’u asina ona karta autorizasaun ba parte Aprovizionamentu atu anúnsia konkursu públiku hodi halo manutesaun ba mákina produsaun BI iha munisípiu neen ne’ebé daudaun ne’e avaria hela,” Ministru Justisa ne’e hateten ba jornalista iha Gabinete MJ Colmera,segunda ne’e.
Governante ne’e rekoñese ho mákina imprime BI iha munisípiu hirak ne’e avaria hela, nune’e prosesu atendimentu BI la funsiona tanba labele imprime dokumentu sira ne’e.
“Ha’u hatene ona problema ne’e, nune’e ha’u delega kompeténsia no konfiansa tomak ekipa aprovizionamentu atu haree no ha’u hein relatoriu hosi aprovizionamentu mai atu aprova hodi halo manutensaun atu funsionamentu liga ba atendimentu BI iha munisípiu neen ne’ebé la’o di’ak,” dehan Governante ne’e.
Daudaun, MJ esfosu atu dijitaliza sistema atendimentu BI no Sertidaun Nascimentu iha notariádu hodi mellora prosesu atendimentu ba públiku.
“Ha’u hanoin ona atu halo rejista online ho sistema, agora moderna ona sistema avansadu ona, ba hirak ne’ebé bele asesu internet, hirak ne’ebé hakerek hatene, bele asesu liuhosi online, rejistu tiha ne’ebá hafoin ba selu bele ba foti nian dokumentu iha notariadu,” nia afirma.
MJ nota iha prosesu atendimetu BI no Sertidaun Nascimentu iha servisu konservatóriu Caicoli hasoru problema, iha loron Kuarta no Kinta tanba sidadaun tenke ba forma ho liña naruk hodi trata dokumentu refere.
“Ha’u identifika ona problema ho Diretór sira para depois rezolve lalais, tanba loloos ne’e kestaun tékniku, maibé sira (Diretór) haree sai sériu tiha no nunka rezolve, ikus mai afeta ba sidadaun sira nian direitu ne’ebé asesu ba dokumentu,” nia lamenta.
MJ mós hahú planu, iha semana ne’e, loke tan balkaun atendimentu BI no Sertidaun Nascimentu iha área Bekora no Comoro tanba fatin ne’ebé daudaun iha la sufisente atu halo atedimentu ba populasaun sira.
Kona-ba orsamentu, nia dehan MJ laiha orsamentu iha kategoria kapitál menór tanba ne’e Ministériu Finansa sei halo karta ba Ministériu Finansa atu husu autorizasaun halo transferesia osamentu hosi item seluk atu sosa komputadór, scanner no printer atubele atende rezolve lalais kestaun ne’e.
“Ha’u hanoin ne’e presiza deit $50.000 atu rezolve hotu ona problema ne’e,” nia afirma.
Aleinde ne’e, MJ mós sei regulariza Diresaun Jerál Servisu Rejistu Notariádu ho diploma ministerial atu sidadaun sira ne’ebé halo tratametu BI no Sertidaun Nascimentu tenke kumpre lei hodi selu tanba durante ne’e la selu.
Notísia relevante: Mákina prodús BI avaria dezde 2017, DMCSRN Bobonaro husu MJ solusiona
Jornalista : Natalino Costa
Editór : Florencio Miranda Ximenes
