Transporte para iha Estasionamentu iha área Banco Nasionál Ultramarinho (BNU) nia oin. Imajen Tatoli/Dok

DILI, 30 maiu 2022 (TATOLI)—Koordenadór Servisu Lisensiamentu Publisitáriu Munisípiu Dili, Julio F. L do Rosario, relata iha janeiru to’o marsu 2022 ne’e, Servisu Lisensiamentu Publisitáriu Munisípiu Dili rekolla taxa publisidade hamutuk $63,685.43.

“Taxa publisidade ne’ebé ita rekolla iha janeiru to’o marus ne’e hamutuk $63,685.43,” Julio F. L do Rosario hateten ba Agência Tatoli iha nia knar fatin, Matadoru, Díli, segunda ne’e.

Hosi taxa atividade publisidade ne’e, Servisu Lisensiamentu Publisitáriu, Munisípiu Dili rekolla hosi área avenida no rua iha kapitál Díli.

“Ami rekolla taxa publisidade ne’e, bazeia ba ema-nia rekerimentu ne’ebé mak sira submete mai Servisu Lisensiamentu Publisitáriu iha 2022 nia laran,” nia dehan.

Maske nune’e, nia akresenta, iha taxa atividade publisidade ne’e, Servisu Lisensiamentu Publisitáriu, Munisípiu Dili rekolla atividade taxa publisidade hosi tipu haat (4), hanesan publisidade toldo, kertas, paineis no bandeira.

“Iha tipu hirak ne’e, mak ami durante ne’e kobre hela, maibé iha tipu balun hanesan unidade mobille publisitária. Alende ne’e, publisitária tipu lian no lakan (Sonora) mak durante ne’e ami seida’uk la’o, tanba bainhira ita atu kontrola kona-ba tipu hirak ne’e ita presiza fora servisu, hanesan kalan mak ita foin la’o. Tanba ne’e, ami agora sei iha planu nia laran, nune’e ba futuru ami bele hala’o fila-fali atividade publisitáriu sonora nian iha tempu tuir mai,” nia dehan.

Entretantu, publisidade ne’ebé durante monta iha estrada protokolu iha munisípiu sira, inklui Díli hatuur iha Dekretu-Lei númeru 51/2016 ne’ebé promulga ona hosi Prezidente Repúblika iha loron 14 dezembru 2016 sobre lisensiamentu mensajen publisitária ne’ebé mak sei selu porsentu 25 ba Governu.

AMD menus fasilidade kobre taxa publisidade

Entretantu, Koordenadór Servisu Lisensiamentu Publisitáriu ne’e informa, Servisu Lisensiamentu Publisitáriu, Munisípiu Dili, menus fasilidade ba kobre taxa publisidade ne’ebé monta iha estrada protokolu kapitál Dili.

“Atividade kobre taxa publisidade ne’e, ita-nia difikuldade mak fasilidade no nesesidade kona-ba funsionáriu sira nian. Tanba, atividade reseita publisidade ne’e hahú hosi 2016 to’o agora la’o ho di’ak, maibé ami-nia fasilidade ne’ebé durante iha ne’e minimu tebes no ba fali nesesidade ba funsionáriu sira ida ne’e mós la sufisiente ba membru sira, ida ne’e mak difikulta ami,” nia dehan.

Maibé, nu’udar timor-oan ne’ebé haknar an ba Servisu Lisensiamentu Publisitáriu durante ne’e oferese tebes sira-nia an atu oinsá bele rekolla taxa ne’ebé di’ak, nune’e bele dezenvolve Timor-Leste iha aspeitu hotu no bele kontribui ba dezenvolvimentu iha rai laran.

Tuir nia, durante ne’e Servisu Lisensiamentu Publisitáriu, Munisípiu Dili, hala’o atividade rekolla taxa publisidade ne’e hanesan seksaun ida iha Autoridade Munisípiu Dili ne’e mós difikulta Servisu Lisensiamentu Publisitáriu, Munisípiu Dili nia servisu.

“Tanba, ami-nia planu, vizaun no misaun ne’ebé ami atu trasa ba ami-nia planu programa defisil tebes. Bainhira ita atu trasa planu ne’ebé di’ak atu dezenvolve servisu ida-ne’e presiza nia ne’e nu’udar mós Dirasaun ida ka nia mós nu’udar unidade ida-ne’ebé mak espesiál tebes iha Autoridade Munisípiu Dili, nune’e nia bele iha planu rasik no nia bele iha osan rasik atu nia jere, hafoin bele atinje ba ita-nia vizaun no misaun ne’ebé di’ak,” nia hateten.

Tanba, durante ne’e Servisu Lisensiamentu Publisitáriu, Munisípiu Dili hanesan seksaun ida iha Autoridade Munisípiu Dili, entaun tutela fali ba iha Dirasaun seluk iha departamentu seluk, entaun planu hirak ne’e Servisu Lisensiamentu Publisitáriu Munisípiu Dili submete ba iha departamentu no departamentu submete ba iha dirasaun, dala ruma planu balun bele elimina no planu balun aprova.

“Entaun, difisil atu suporta ba atividade másimu iha Servisu Lisensiamentu Publisitáriu, Munisípiu Dili,” nia afirma.

Maske nune’e, nia akresenta, Servisu Lisensiamentu Publisitáriu, Munisípiu Dili nia difikuldade ba fasilidade mak transporte laiha tanba sira fofoun hala’o knar ida-ne’e hosi Ministériu Dirasaun Organizasaun Urbana mak uluk suporta kareta ida, maibé kareta ne’e mós nia kondisaun ladun di’ak tanba kareta ida ne’ebé ladun uza ona.

Alende difikuldade fasilidade transporte iha mós difikuldade ba ekipamentu administrasaun, hanesan komputadór no printer.

“Ami hala’o knar ne’e ho buta hot-hotu ne’ebé uzadu, ami utiliza dala ruma print dokumentu balun mós error, entaun ami-nia atividade barak mak paradu hela de’it,” nia hateten.

Tanba ne’e, Servisu Lisensiamentu Publisitáriu Munisípiu Dili hakarak rekomenda ba Ministériu relevante sira atu oinsá ba futuru bele mós tau importánsia ba atividade ne’ebé Servisu Lisensiamentu Publisitáriu Munisípiu Dili hala’o.

“Ita nu’udar Nasaun ida, ita labele garante de’it ba ita-nia mina-rai ne’ebé durante ne’e la’o iha rai laran. Ita-nia orsamentu OJE, durante ne’e ita garante hela ba fundu mina nian, maibé ba área taxa nian ne’ebé mak agora la’o hanesan publisitáriu no estasionamentu ne’ebé eziste iha Munisípiu Dili. Bainhira ita-nia reseita hirak ne’e hatama ho di’ak presiza mós fó apoiu fasilidade,” nia dehan.

Jornalista : Nelia Fernandes

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here