Sekretária Estadu ba Igualdade no Inkluzaun (SEII), Maria do Rosário Fátima Correia. Imajen Tatoli/Francisco Sony.

DILI, 30 maiu 2022 (TATOLI)—Sekretária Estadu Igualdade no Inkluzaun (SEII), Maria do Rosária Fátima Correia, hateten Grupu traballu jéneru iha liña ministeriál tenke konsidera asuntu igualdade inkluzaun ba sira-nia programa no orsamentu kada tinan nian.

“Objetivu prisipál ohin, ita hasoru malu ho grupu traballu jéneru iha liña ministeriál atu bele konsidera asuntu igualdade inkluzaun ba sira-nia programa ho nia orsamentu kada tinan ba Orsamentu Jerál Estadu nian,” Maria do Rosária Fátima Correia hateten ba jornalista sira, hafoin halo enkontru ho grupu traballu jéneru iha liña ministeriál sira ho munisipál, iha Delta Nova, Dili, segunda ne’e.

Iha ministériu balun ne’ebé iha ona konsiénsia kona-ba importánsia hosi promove igualdade jéneru no inkluzaun sosiál iha ida-idak nia setór sira.

Bazea ba SEII nia análiza katak proposta Planu Asaun Anuál no orsamentu tinan 2022 nian nota katak iha tinan 2022 iha aumentu signifikante hosi instituisaun 37 ho nia pursentu 51 (51%) iha 2021 hosi liña ministeriál sira.

Sekretáriu Estadu sira no Ajénsia Autónomu ne’ebé mak implementa programa ho OJE 2022 ne’e, SEII instituisaun hamutuk 33 mak aloka orsamentu ba eskola 980 ba programa Igualdade Jéneru no Inkliuzaun sosiál nian.

Instituisaun Estadu ne’ebé mak ko’alia kona-ba asuntu Igualdade Jéneru no Inkluzaun Sosiál hamutuk 14, interministeriál iha rua, Sekretáriu Esatadu rua, Ajénsia Autónomu hamutuk ualu, munisípiu hamutuk ualu no mós Rejaiun Administrativu Espesiál Oé-Cusse (RAEOA).

Ba atividade 510011 abordajen integradu jéneru ne’e iha instituisaun hamutuk 18 no ministériu iha haat no orsamentu ne’ebé mak aloka ba programa 980 hamutuk $203,784,892.

“Ida-ne’e hatudu avansu boot ida hodi servisu abordajen integradu jéneru no asegura orsamentu sensivél ba jéneru nian. Tanba Grupu traballu jéneru nia papel importante tebes iha ita-boot sira-nia instituisaun hodi kontinua koordena implementa ba atividade no programa sira,” nia hateten.

Biban ne’e, nia husu ba ministériu relevante sira atu konsidera mós kuota 30% ba feto emprezáriu sira.

Iha relatóriu ne’e ita ezize ba ministériu relevante sira hanesan Vise Primeiru-Ministru ba Infraestrutura no Obras Públika atu konsidera mós sira kuota 30% ba iha feto emprezáriu sira atu bele kompete mós projetu ne’ebé mak sei boot no halo advokasia ba ministériu relevante.

Aleinde ne’e, iha mós ministériu Transporte no Komuniksaun ba grupu feto utiliza telefone Android hodi bele promove sira-nia produtu iha merkadu sira no lansa mós sidade seguru iha Lospalos.

“Haksolok boot tanba ha’u assume resposabilidade hanesan SEII, ha’u observa katak iha liña ministeriál no Ajensia Dezenvolvimentu Nasionál (ADN) kolabora ho SEII ho parseiru sira hodi halo ona avaliasaun implementasaun deklarasaun iha setór infraestrutura ne’ebé nia relatórriu sei lansa iha tempu badak.

Sekretáriu Munisípiu Lautém, Jacinto da Costa, hateten grupu vulneravel sira-ne’e SEII nia pontu vogál sira inklui iha mós funsionáriu kazuál ida depois hamutuk ho funsionáriu ajénsia na’in-rua mak durante ne’e hala’o atividade liga ho asuntu grupu traballu jéneru nian.

Kada tina SEII sempre aloka osan ba pontu vogál SEII iha nivel munisípiu sira hotu hodi bele hala’o atividade no iha Lautém hala’o atividade sertame ba grupu feto sira, ajuda mós feto sira hodi haki’ak ikan, loke kioske no halo kreditu no seluk tan.

Ba tinan ne’e, Administrasaun munisípiu mak koloka osan operasaionál nian hamutuk rihun $500 hodi hala’o atividade sira.

Ho ida-ne’e, nia husu SEII sei di’ak liután halo asina akordu interministeriál ida ho Ministériu Administrasaun Estatál (MAE) nian, nune’e sira-nia funsionáriu tama iha parte kontrollu administrasaun munisípiu nian.

“Nune’e, ami bele halo rekrutamentu kazuál balun hodi suporta sira,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here